“Nëse të ofroj një superushqim, që të bën të jetosh më gjatë, a je i interesuar?”
Kështu pyet gazetari i BBC, James Gallagher, që thotë se bëhet fjalë për një ushqim që redukton në mënyrë natyrale sulmet në zemër, ishemitë dhe sëmundjet afatgjata si diabeti i tipit 2.
Po ashtu mban nën kontroll peshën, presionin e gjakut dhe ul nivelin e kolesterolit.
Mbi të gjitha, është i lirë dhe gjendet kudo nëpër supermarkete.
Por çfarë është ky ushqim?
Fibra. Një studim i fundit ka zbuluar se ka përfitime të jashtëzakonshme në shëndet.
Profesor John Cummings thotë se provat janë të shumta dhe njerëzit duhet të nisin të bëjnë diçka menjëherë pasi do ndryshojnë jetën e tyre.
Deri më tani njihet për kurimin e kapsllëkut, por përfitimet shëndetësore janë shumë, shumë më të mëdha.
Shkencëtarët thonë se duhet të konsumojmë minimumi 25 gram fibra në ditë. Kjo është sasia adekuate për përmirësimin e shëndetit. Përfitimet rriten ndjeshëm kur kalon 30 gram në ditë.
Shumica e njerëzve në botë, mbi 90 përqind, nuk konsumojnë mjaftueshëm fibra.
Edhe në vendet e zhvilluara, si Britania, më pak se një në dhjetë persona konsumon 30 gram fibra çdo ditë.
Por është një sfidë e vërtetë që të rrisësh sasinë e fibrave që merr çdo ditë.
Fibrat gjenden në fruta, perime, drithërat e mëngjesit, bukë, makarona, thjerrëza, fasule, arra, fara, etj.
Gjysmë filxhan me tërshërë përmban 9 gram fibra. Një fetë e trashë buke kafe ka 2 gram. Një patate e zier më lëkurë ka 2 gram. Një karotë ka 3 gram fibra. Një mollë me lëkurë ka 4 gram.
Disa këshilla që jepen për të përfituar sa më shumë fibra janë këto:
-Gatuajini patatet me lëkurë.
-Zëvendësojeni bukën e bardhë, makaronat dhe orizin më versionin që vjen nga gruri i plotë.
-Zgjidhni për mëngjes drithëra me fibra siç është qulli i tërshërës.
-Përdorni miell që vjen nga gruri i plotë.
-Mund të hidhni fasule, thjerrëza, misër ose fruta të thata mbi sallatë.
-Konsumoni arrorë ose fruta të freskëta në vend të ëmbëlsirave.
-Konsumoni të paktën pesë racione fruta ose perime çdo ditë.