Zbardhen detaje të reja nga aksioni i Policisë së Tiranës për goditjen e call center-ave, që mashtrojnë qytetarët.
Policia ka identifikuar ambientin, ku ishte vendosur call center-i i paregjistruar, që mashtronte shtetasit e huaj.
31-vjeçari i arrestuar, Olti Ferhataj, së bashku me tre shtetasit e proceduar, mashtronin qytetarët, duke thënë se ishin agjentë burse dhe i bindin ata të investonin shuma të konsiderueshme për të blerë monedha elektronike.
Rasti i fundit ishte një qytetar italian, i cili është mashtruar nëpërmjet telefonave për të investuar mbi 100 mijë euro për të blerë kriptomonedha.
“Një shtetas italian ka investuar në muaj të ndryshëm, nëpërmjet këtyre telefonatash një shumë prej 108 mijë eurosh. Shuma nuk është derdhur në një ditë, por në muaj të ndryshme. Ferhataj i thoshte italianit se duke investuar paratë e tij, pasuria do t’i shumëfishohej. Një operacion i ngjashëm ka ndodhur dhe në Durrës paditen e djeshme”, tha gazetarja Dorjana Bezat.