Tërmeti që goditi vendin tonë pasditen e sotme, vjen dy vite pas atij të 21 shtatorit të vitit 2019, me magnitudë 5.8 ballë i shkallës rihter.
Jo vetëm në të njëjtën datë, por edhe ora është e përafërt, rreth orës 16:00 ka rënë edhe tërmeti i dy viteve më parë. Lëkundjet sizmike të 2019 rezultuan shkatërrimtare dy muaj pas tërmetit të shtatorit.
Në 26 nëntor 2019, rreth orës 04:00 të mëngjesit, u regjistrua tërmeti 6.4 ballë i shkallës rihter, me epiqendër në detin Adriatik, pranë Hamallajt. Bilanci ishte katastrofik, 51 qytetarë humbën jetën dhe dëmet materiale ishin kolosale, aq sa janë të prekshme edhe sot e kësaj dite.
Ndërsa tërmeti i sotëm ishte me magnitudë më të vogël se ai i shtatorit 2019, 3.7 ballë i shkallës rihter dhe thellësi 10 km, 24 km në verilindje të Tiranës dhe 6 km në jug të Klosit.
Nuk ka të dhëna për dëme në njerëz apo materiale, ndonëse lëkundjet janë ndjerë në disa qytete. Të forta ato janë ndjerë në qytetet Tiranë, Elbasan, Klos dhe Burrel, zona këto pranë epiqendrës së lëkundjes.
Për sizmiologët tërmeti i sotëm është i vogël dhe me epiqendër në një zonë ku ndodhin vazhdimisht lëkundje sizmike. Sizmologu Rrapo Ormeni është shprehur se zona Elbasan-Dibër është zonë me intensitet sizmike, ndërsa shtoi se nuk pritet të ketë tërmet tjetër më të madh.
“Kjo epiqendër është në verilindje të Tiranës, kryesisht zona Elbasan-Dibër dhe në këtë zonë ndodhin shpesh këto lloj tërmetesh që ne i quajmë të vegjël dhe nuk presim te kete deme“, tha gjatë intervistës në Syri Tv.
LEXO EDHE:
Etiketa: tërmet, Termeti ne Shqipëri
