Kryetari i Bindjes Demokratike, Astrit Patozi ka uruar qytetarët për Ditën e Verës nga qyteti i Elbasanit, teksa u ka bërë thirrje të bëjnë zgjedhje të duhur më 25 prill, në mënyrë që të vijë vera.
Në një prononcim për mediat, pas një takimi me kandidatët për deputetë të Bindjes, Patozi tha se shqiptarët duhet të ndërrojnë dyqanin e ballokumeve, sepse nuk mund të shkojnë tek të njëjtët shitës mashtrues, që i gënjejnë me produkte false dhe ballokume të prishura, një herë në çdo dy vjet, sa herë ka zgjedhje në Shqipëri.
Patozi iu referua kështu Partisë Socialiste, me premtimet boshe dhe të pambajtura.
Ai gjithashtu komentoi përplasjet mes simpatizantëve PD-PS, dhe fajtor bëri pikërisht socialistët.
“Sot në Elbasan nuk ishte një ditë me diell, por një ditë gri. Gjë që tregon se vera vetëm festën ka sot, por duket se ajo do të vonohet pak (…) Ata e treguan se nuk kanë ndryshuar asgjë, pasi u zunë dhe u sherrosën me njëri-tjetrin, duke e bërë të qartë se është e vetmja gjë që dinë të bëjnë, madje edhe në ditë feste, kur politika normalisht duhet të ulë armët”, – tha Patozi.
