Marrë nga gazeta “Koha Jonë” e datës 05 prill 1998, Përgatiti për Laert Miraku
Prokuroria pengon hetimet
Duhet të rishikohet amnistia e Berishës
Prokuroria kërkon të rishikohet edhe njëherë ligji për amnistinë që ka firmosur një vit më parë ish presidenti Berisha. Gjatë hetimeve, kryesisht të çështjeve të kontrabandës, ka dalë se persona të ndryshëm janë inkriminuar më shumë se dy herë me këtë vepër.
Por hetimi i tyre i mëtejshëm, i cili mund të sillte të tjera gjëra në skenë, ndërpritet sepse vepra rezulton e amnistuar. Ndërsa të gjitha çështjet penale nën hetim që përfshinte ky ligj tashmë janë të varrosura njëherë e përgjithmonë, në skenë kanë dalë ato vepra penale që përpara datës kur është firmosur amnistia, nuk rezultojnë të zbuluara nga organet e drejtësisë.
Fakte të tilla e kanë parë dritë e zbardhjes atëherë kur grupe të ndryshme kontrolli kanë ushtruar veprimtarinë e tyre nëpër institucione apo dhe firma private. Madje, ka nga ato denoncime, që depozitohen nëpër zyrat e hetimit nga qytetarë të ndryshëm, ndërkohë që në këtë pozicion juridik nuk dihet se si të veprohet nga ana e prokurorëve për shkak se vepra e – denoncuar është amnistuar.
Fjala është për dhjetëra raste kontrabande dhe krime të tjera, të cilat janë zbuluar pikërisht në këtë kohë dhe që shpëtohen për bukuri nga amnistia e parlamentit të vjetër. Vetëm pas pak muajsh kur nisi zbatimi i neneve të amnistisë, njerëzit e hetimit e kanë cilësuar atë, si një proces të studiuar me laps në dorë, madje disa të tjerë e cilësuan si një krim. Megjithatë, ende nuk dihet në se do të ndryshohet ndonjëherë ndonjë nen i saj qoftë për të hetuar krimet e pazbuluara. R.Q
Marrë nga Liberale.al
