Marrë nga gazeta “Koha Jonë” e datës 29 mars 1998, Përgatiti për Liberale.al, Laert Miraku
Drejtoria e Policisë Kriminale jep alarmin: Në mars katër raste
Shqipëri- Serbi, trafik armësh
Dyshime se një pjesë e armëve shkon për UÇK dhe ushtrinë serbe
TIRANË – Trafiku i armëve të zjarrit ka filluar të rrjedhë në drejtim të Kosovës. Autoritet e Ministrisë së Brendshme kanë deklaruar dje për “Koha Jonë” lajmin sensacional, pas alarmit të dhënë më parë nga shërbimet sekrete dhe ato policore të vendeve të huaja, mbi trafikun e armëve me origjinë nga Shqipëria. Në bazë të këtyre njoftimeve, pas hetimeve të bëra ditët e fundit, policia kriminale në Ministrinë e Brendshme ka konstatuar se disa prej armëve të grabitura nga depot ushtarake në mars të vitit të kaluar, po grumbullohen nga individë apo grupe qytetarësh kosovarë me qëndrim të përkohshëm në Shqipëri.
Sinjalet e trafikut ilegal kanë ardhur nga rrethi i Kukësit, ku në disa posta kufitare, ka mungesa në ushtarë dhe mjete vëzhgimi si nga pala shqiptare, ashtu edhe ajo serbe. Ka qenë ndoshta ky shkaku, që prej këndej, kanë mundur të kalojnë qindra armë zjarri dhe materiale të tjera ushtarake, të grabitura në depot e ushtrisë sonë. Autoritetet policore dyshojnë për mundësinë e një bashkëpunimi ndërmjet trafikantëve, shqiptarëve në kufi dhe kufitarëve jugosllavë, për interes të serbëve për interesa fitimi material.
Një burim nga drejtoria e policisë kriminale, në Ministrinë tonë të Brendshme, nuk ka përjashtuar faktin se armët mund të shkojnë edhe në Kosovë për të furnizuar UÇK-në, apo e destinuar për trafikun ndërkombëtar të armëve që kalon nëpërmjet Serbisë. Megjithëse nuk është përcaktuar ende sasia, rrugët, grupimet dhe destinacioni final i këtyre armëve, mungesa e infrastrukturës policore pengon ndërprerjen e trafikut.
Deri tani nuk ka qenë e mundur madje, as pengimi edhe i një fushatë grumbullimi armësh për tregtim, në zonat verilindore të vendit, që duket të jenë të destinuara për në anën tjetër të kufirit të Shqipërisë. Sipas statistikave në Drejtorinë e Policisë Kriminale në Ministrinë e Brendshme, vetëm brenda këtij muaji, janë regjistruar të paktën katër raste kapje të trafikantëve të armëve në flagrancë, pavarësisht se këto nuk janë publikuar.
Nga ana tjetër, ka të dhëna se pala serbe nga ana e saj, ka bërë të njëjtën veprim kur jo vetëm nuk ka pranuar të publikojë rastet e trafikut, por ushtria serbe ka përgënjeshtruar zyrtarisht rastet e denoncimit të këtij fenomeni nga ana e Ministrisë së Brendshme serbe. Kjo për shkak të dyshimeve që ekzistojnë se segmente të ushtrisë serbe, janë të implikuar në trafik. Ka qenë ndoshta ky shkaku që rastet e kapura, nuk i janë dorëzuar policisë shqiptare. Informacionet operative të agjentëve të antikrimit shqiptar, konfirmojnë se çmimi për një automatik “Kallashnikov” varion nga 25-30 mijë lekë të reja, por ka patur raste, në ditët e tensionuara në Kosovë, kur çmimet kanë qenë edhe më të mëdha.
Ka gjasa që në këtë veprimtari ilegale, të mos jenë implikuar vetëm grupime individësh të veçantë për qëllime përfitimi, po edhe struktura të organizuara. Rastet e trafikimit ilegal të armëve në drejtim të Kosovës, rezultojnë vetëm në javët e fundit. Kjo kur kihet parasysh një deklaratë e Sekretarit të Shtetit për Politikat e Mbrojtjes, Perikli Teta që kishte përgënjeshtruar lajmë të shtypit që i referoheshin shërbimeve sekrete, se armë nëpërmjet Shqipërisë shkonin në Kosovë.
Të dhënat e policisë dhe të shërbimeve sekrete të Greqisë dhe Italisë, flisnin për flukse tregtimi armësh në këto vende. Kjo për shkak të çmimeve më të larta të ofruara nga tregjet e këtyre dy vendeve. Në fqinjin tonë jugor, çmimi i një “Kallashi” shkonte deri në 200 mijë dhrahmi, ndërsa Mafia italiane është publikuar të ketë bërë blerje deri në 1 mijë dollarë për automatik. ANILA PRIFTI
