Prej dy ditësh 28 persona që vuajnë dënimin në burgun e Reçit, kanë nisur grevën e urisë. Të burgosurit kërkojnë kushte më të mira si dhe shërbimet mjekësore e dentare, të cilat sipas tyre janë paguar po nuk u janë ofruar deri më sot. Të burgosurit kanë kërkuar që të kenë mjek në burg pasi prej disa kohësh aty mungon totalisht shërbimi shëndetësor.
Gjithashtu të burgosurit kanë kërkuar që të ketë ujë të ngrohë për dushe, pasi lahen me ujë të ftohtë. Ndërkohë të burgosurit kanë kërkuar edhe uljen e numrit të personave që vuajnë dënimin në burgun e Reçit. Pas tërmetit të 26 nëntorit, burgu është mbipopulluar si pasojë e transferimit të të burgosurve të burgut të Lezhës.
Burime për Mapo.al bëjnë me dije se të burgosurit po e zhvillojnë grevën e urisë në korridore, pasi nuk lejohen ta zhvillojnë atë në ambientet e tjera.
