Aranit Muraçi
Eksodi i mjekëve shqiptarë drejt Europës dhe sidomos drejt Gjermanisë, është një fenomen dramatik, që nuk ka të ndalur. Sipas arkivave të Dhomës së Mjekëve në Gjermani numërohen rreth 1.200 deri në 1.500 mjekë, të cilët kanë emigruar drejt Gjermanisë në 10 vjeçarin e fundit, ndërkohë që nga bluzat e bardha në total janë larguar gjatë kësaj periudhe rreth 3.500.
Shifrat dramatike i publikoi Aurora Dollenberg, përfaqësuese e Federatës së Mjekëve shqiptarë të Europës në një intervistë për “Liberale.al”.
Këtu numërohen infermierët në radhë të parë, teksa shihet një eksod masiv i profesionit të infermierisë, si pasojë e kushteve shumë herë më të mira, pagave më të larta dhe sigurisë që kanë këta profesionistë në ushtrimin e profesionit të tyre, në Gjermani. Po ashtu nuk mungojnë edhe farmacistët, dentistët, teknikë laboratori, të shëndetit publik, fizioterapistë, të cilët kanë një tendencë në rritje për të ikur drejt Gjermanisë. Këto shifra janë vërtet shumë alarmante, nëse llogaritet gjithmonë numri i profesionistëve të emigruar, në proporcion me popullatën.
Si mund të ndalet largimi i mjekëve dhe infermierëve?
Rektori i Universitetit të Mjekësisë, Arben Gjata, theksoi se kanë institucioni që ai drejton ka kërkuar që të hapen programe specializimi në fushën e mjekësisë, pra përveç 6 viteve fakultet, të jenë të detyrueshme edhe 4 vite të tjera specializim. Gjata nënvizoi për mediat sot se dega e mjekësisë duhet të shoqërohet dhe me detyrim që studentët të qëndrojnë për një periudhë kohe në Shqipëri, që të mos largohen, kur të mbarojnë universitetin.
Ai pranoi se largimi i mjekëve në vende të ndryshme nuk është thjesht një fenomen shqiptar, por një fenomen që ndodh gjithandej, përfshirë dhe Gjermaninë, ndërkohë që ndezi debatin duke propozuar që të ngrihet politika efikase për të parandaluar largimin e bluzave të bardha.
Për shkak të largimit të vazhdueshëm të mjekëve, aktualisht në shumë spitale të rretheve hasen mungesa të mjekëve specialistë. Nëse fenomeni nuk ndalet, ose nuk gjendet zgjedhje, mundet që në një kohë të shkurtër edhe Tirana të përballet me pasojat e mungesës së stafit mjekësor.
Sipas rektorit të mjekësisë, nga ana e institucionit që ai drejton, i është kërkuar qeverisë, që të hapen sa më shpejt programet e specializimit. Gjata propozon se duke e futur në degët prioritare mjekësinë, kjo të shoqërohej dhe me detyrim për të qëndruar në Shqipëri, për njëfarë kohe, pasi studenti të mbarojë për 10 vite fakultetin. Formimi i studentëve të mjekësisë i kushton shumë buxhetit të shtetit shqiptar. Drama më e madhe është largimi, pavarësisht kostos së lartë që shpenzon buxheti i shtetit, për formimin e tij. Pra, duket sikur Shqipëria prej vitesh po investon në mjekësi, për t’u kujdesur për “shëndetin” e Gjermanisë.
Studentët që vijojnë aktualisht specializimin, 4 vitet pas Mjekësisë së Përgjithshme, shpesh ankohen se nuk paguhen ose trajtohen si mjekë “të dorës së dytë”. Pasi përfundojnë studimet, prej një dekade profesionistë të shëndetit publik po largohen vit pas viti në vendet e zhvilluara të Europës.
Nga plakja e popullsisë së Europës dhe emigracioni, vendet perëndimore gjatë viteve të fundit po përballen me kërkesë të shtuar për mjekë. Në këto kushte, ato janë duke rrëmbyer në fushat që kanë nevojë profesionistë nga vendet e tjera të varfra të kontinentit.
Vendi ynë, i konsideruar si më varfri i Europës, por edhe me problematika të theksuara sociale dhe ekonomike, duke mos u dhënë zgjidhje, është më i godituri nga hapja e tregut të punës me Europën.
Ndaj edhe debati pas propozimit të rektorit të Mjekësisë kërkon zgjidhje: Si mund të parandalohet largimi i bluzave të bardha drejt Gjermanisë? /Liberale.al/
