Atalanta ndodhet në Bergamo, në qendër të pandemisë së coronavirusit, por vetëm tani kanë kaluar në izolim, sepse Valencia, me të cilën ata u ndeshën në mesjavë për 1/8 e Champions, rezultoi me pesë raste pozitive.
Skuadra italiane duhej të kthehej në stërvitje javën e ardhshme, por planet e tyre u detyruan të ndryshojnë pasi Valencia njoftoi se tre lojtarë të tyre dhe dy anëtarë të stafit kishin rezultuar pozitivë për COVID-19. Kjo bëri që italianët të futen në karantinë për 14 ditë.
Nga tre lojtarët e përfolur në media – Ezequiel Garay, Eliaquim Mangala dhe Jose Gaya – vetëm Gaya luajti në ndeshjen e dytë në Mestalla më 10 mars.
Mangala luajti në San Siro më 19 shkurt, ndërsa Garay ishte i dëmtuar dhe mungoi në dy ndeshjet.
Pavarësisht se janë në zonën më të goditur nga kjo pandemi në Itali, rajoni i Lombardisë, Atalanta deri më tani i ka shpëtuar infektimit si nga radhët e lojtarëve ashtu edhe të stafit teknik.
Vlen të theksohet se pjesë e klubit nga Bergamo është edhe mbrojtësi shqiptar, Berat Gjimshiti.
11 lojtarët e Serie A të cilët deri më tani kanë rezultuar pozitivë janë nga Sampdoria (shtatë), Fiorentina (tre) dhe Juventus (një).
Deri më tani ka pasur 1,809 vdekje nga koronavirusi në Itali, nga të cilët 1 218 janë nga rajoni i Lombardisë.
LEXO EDHE:
