Drejtori i Institutit Pashko, Prec Zogaj deklaroi se Sali Berisha është politikani më i izoluar në historinë e shtetit shqiptar. I ftuar këtë të premte në emisionin “Publikisht” në RTSH, Zogaj theksoi se Berisha si kryetar i PD-së nuk njihet as nga kundërshtarët politikë dhe as nga ndërkombëtarët në Europë.
“Një politikan, që është politikani më I izoluar në historinë e Shqipërisë. Bilës ua kalon dhe të mëparshmëve që kanë qenë vetë të izoluar. Nuk është njohur nga asnjë parti. Nuk ka marrë asnjë urim nga Europa për zgjedhjen e tij. Këto janë fakte. Një politikan, që është politikani i izoluar si asnjë tjetër në historinë e Shqipërisë thërret dhe kërkon që t’i shkojnë njerëz pas tij. Le të shkojnë, por mua më duket se është naivitet dhe qëndrim apolitik”, deklaroi Preç Zogaj.
Për protestën e thirrur nga Berisha më 7 korrik, Zogai sqaroi se është e paqartë. Ai tha se Berisha po organizon këtë protestë për qëllimet e veta; për t’i bërë presion drejtësisë dhe për të sfiduar SHBA-të.
“Është një protestë e paqartë. Është një dëshirë e Sali Berishës për të bërë një foto me turmë nga pas. Sa më të madhe. Për ta përdorur për presion kundër drejtësisë dhe për të sfiduar shtetet e bashkuara të Amerikës. Duke harruar se SHBA-të i kanë në kohë reale preferencat e shqiptarëve. Shumica dërrmuese e shqiptarëve janë pro amerikan dhe pre europian”, deklaroi mes të tjerash Preç Zogaj.