Ish-Kryeministri Sali Berisha tha sonte se Rudina Hajdari duhet të përjashtohet nga PD njësoj si Myslym Murrizi.
Kujtojmë se vajza e heroit të demokracisë, Azem Hajdari është një ndër 3 deputetët e PD-së që nuk ka dorëzuar ende mandatin e deputetit. Sakaq, PD nxitoi të përjashtojë nga partia Myslym Murrizin e Lushnjës, ndërsa ende nuk ka reaguar për znj. Hajdari. I treti është Nard Ndoka që është shprehur se do e lërë mandatin.
Sali Berisha i ftuar sonte në “Ora News” nuk iu shmang pyetjes për vajzën e Azem Hajdarit. Ai tha se “PD nuk duhet të veprojë me dy standarte”, duke lënë të kuptuar se përderisa u përjashtua Murrizi duhet të përjashtohet dhe Rudina Hajdari.
Sakaq i pyetur se kush e hodhi i pari idenë për të djegur mandatet e opozitës, Berisha u shpreh: “Unë kam qenë! Nuk e mohoj! Por një gjë të them, nuk jam unë që e kam nxitur. Disa herë nga ajo kohë, po të ishte për vendim timin personal e digjja, por nuk doja të ndikoja tek të tjerët. Kam pasur zero ndikim tek liderët e opozitës. Unë di të vetëpërmbahem, por nuk kam dashur t’u imponoj atyre një vendim që e di sa i rëndë është”.
/Mapo.al
