PD akuzoi gjatë javës që lamë pas se anëtari i Këshillit të Lartë të Prokurorisë, Bujar Sheshi, ka qenë bashkëpunëtor i shërbimit informativ gjatë diktaturës. Akuza këto që faktohen edhe nga Autoriteti për Informimin mbi Dokumentet e Ish-Sigurimit të Shtetit, që e cilëson Prokurorin Sheshi si bashkëpunëtor të Sigurimit të shtetit.
Por prokurori Bujar Sheshi prej ditës së parë i ka mohuar akuzat dhe tashmë, pasi është njohur edhe me vendimin e AIDSSH, ka vendosur që ta padisë për “Falsifikimi të dokumenteve” të kryer nga personi që ka për detyre lëshimin e tyre si dhe për veprën penale të “Shpërdorimit të detyrës” të parashikuar nga nenet 186/3 dhe 248 të Kodit Penal.
Kryetarja e Autoritetit të Dosjeve, Gentiana Sula, ka reaguar pas kallëzimit në Prokurori nga prokurori Bujar Sheshi. Pas një takimi me ambasadoren gjermane, Sula u është përgjigjur interesit të medias duke thënë se u qëndron deklaratave të mëhershme dhe se janë bërë verifikimet e duhura.
“Jemi të hapur për çdo hetim, procesi ka qenë i drejtë, janë marrë të gjithë masat”, tha Sula.
Historia nuk është e thjeshtë pasi Sheshi rrezikon jo vetëm karrierën, por edhe një hetim nëse nuk ka treguar të vërtetën. Sheshi ka qenë i mitur në kohën kur ka bashkëpunuar me Sigurimin e Shtetit, thotë Autoriteti i Dosjeve.
Jo vetëm kaq, por edhe Autoriteti i Dosjeve pranon se ka një problem me gjeneralitetet e tij. A ka mundësi të jetë bërë gabim hetimi për emrin e tij?
Një zyrtar i Autoritetit të Dosjeve tha: “I kemi shkuar të vërtetës deri në fund, ka pasur probleme në gjeneralitetet e tij. Kemi pasur një shkresë që, në emër të personit në fjalë është vetëm ky dhe asnjë tjetër, dhe kjo gjë ka qenë vendimtare për ne”.