Zhvillime pozitive në negociatat mes Moskës dhe Kievit për fundin e luftës në Ukrainë. Këtë e tha vetë presidenti rus Vladimir Putin gjatë një takimi me liderin bjellorus dhe aleatin Aleksandër Lukashenko në Moskë.
Shefi i Kremlinit deklaroi se negociatorët e kishin njoftuar për një ndryshim pozitiv të pozicioneve në bisedimet mes palëve, që siç tha zhvillohen çdo ditë.
Delegacionet nga të dyja vendet kanë zhvilluar tre raunde bisedimesh, ndërsa të enjten pati një takim mes ministrave të Jashtëm, Lavrov dhe Kuleba, i mbyllur pa progres.
Sakaq, Kremlini nuk përjashtoi mundësinë e një takimi mes presidentit rus Vladimir Putin dhe atij ukrainas, Volodimir Zelensky.
Agjencia e lajmeve TASS, citon Kremlinin të thotë se dyshja duhet të takohet për të prodhuar ndonjë rezultat.
Zelensky, nga ana e tij, është më pozitiv për fundin e luftës.
Në një video të publikuar në kanalin e tij në “Telegram”, Volodymyr Zelensky shprehet se Ukraina ka arritur tashmë në një pikë kthese strategjike. “Ne jemi tashmë në rrugën e fitores”, tha ai.
Ndërkohë, në një tjetër video, Zelensky komenton vendimin e Rusisë për të bërë pjesë të ushtrisë së saj mercenarë nga Lindja e Mesme dhe Siria. “Raketa, bomba, artileri e rëndë dhe tashmë edhe mercenarë nga Siria. Ata do të kryejnë vrasje në një tokë të huaj”, tha Zelensky.
