Një aksident i rëndë ka ndodhur pasditen e sotme në rrugën “Bardhyl”, Tiranë. Një makinë ka përplasur një motor, dhe për pasojë ka ndërruar jetë drejtuesi i motoçikletës.
Emri i tij ende nuk dihet, por paraprakisht raportohet me inicialet E.Ç., 27 vjeç. I riu ka ndërruar jetë në spitalin e Traumës, duke mos i bërë dot ballë plagëve të marra.
Sa i takon drejtuesit të mjetit, Policia njofton se është shoqëruar në ambientet e komisariatit Nr.4, për veprime të mëtejshme hetimore.
Grupi hetimor ndodhet në vendngjarje, për zbardhjen e rrethanave të aksidentit tragjik.
Njoftimi i parë i Policisë:
Tiranë/Informacion paraprak
Më datë 30.03.2021, rreth orës 17:15, në rrugën “Bardhyl” mjeti me drejtues shtetasin P. L., ka aksidentuar një motorr me drejtues ende të paidentifikuar rreth 25 vjeç, i cili ndodhet në spital, nën kujdesin e mjekëve. Vijon puna nga grupi hetimor për sqarimin e rrethanave të ngjarjes.
Njoftimi i dytë i Policisë:
Tiranë/Informacion shtesë
Në vijim të informacionit të dhënë mbi aksidentin e ndodhur në rrugën “Bardhyl” ju bëjmë me dije se ; Si pasojë e plagëve të marra ka ndërruar jetë në spital drejtuesi i motorit shtetasi me iniciale E. Ç., 27 vjeç. Ndërsa drejtuesi i mjetit tjetër shtetasi P. L, u shoqërua në ambientet e komisariatit Nr.4, për veprime të metejshme hetimore.
