Lezhë – 2 persona janë vendosur në pranga dhe një tjetër është shpallur në kërkim, për trafikim të lëndëve narkotike.
Bëhet fjalë për të identifikuarit me inicialet N. T. (32 vjeç), Z. M. (30 vjeç) – banues në Lezhë – dhe K.K. (25 vjeç), banues në Barbullojë.
Pas informacioneve të marra në rrugë operative, se një makinë po transportonte drogë nga Kurbini në drejtim të Shkodrës, me qëllim trafikimin drejt Malit të Zi, Policia konstatoi në aksin rrugor Milot-Lezhë 25-vjeçarin K.K. me makinën tip “Golf”.
Ndonëse shërbimet e Policisë i bënë shenjë të ndalonte, drejtuesi i mjetit nuk iu bind urdhrit dhe u largua me shpejtësi, duke braktisur më tej makinën në një servis në fshatin Tresh.
Policia gjeti dhe sekuestroi 21 kilogramë lëndë narkotike kanabis sativa, ndërsa nga hetimet paraprake rezultoi se N.T. dhe Z.M. ishin bashkautorë të K.K. dhe i paraprinin rrugën për ta njoftuar në rast se do të konstatonin pika kontrolli.
Në përfundim të veprimeve, këta dy shtetas u arrestuan në flagrancë për prodhim dhe shitje narkotikësh, kryer në bashkëpunim, dhe iu sekuestrua krahas automjetit me të cilin udhëtonin, 56 gramë kanabis sativa.
Njoftimi i Policisë:
Lezhë
Goditet një tjetër tentativë për trafikim të lëndëve narkotike.
Finalizohet operacioni i koduar “Transportuesi”.
Operacioni i zhvilluar nga Seksioni për Hetimin e Narkotikëve, në bashkëpunim me Forcën Operacionale në DVP Lezhë dhe forcën e posaçme “Shqiponja”.
Vihen në pranga 2 shtetas dhe shpallet në kërkim 1 tjetër.
Sekuestrohen 21 kg e 56 gramë lëndë narkotike e dyshuar cannabis sativa dhe 2 automjetet me të cilat udhëtonin këta shtetas.
Në zbatim të planit të masave për shtimin e kontrolleve në të gjithë territorin e qarkut Lezhë, me qëllim parandalimin, evidentimin dhe goditjen e paligjshmërisë, si dhe mbi bazën e informacionit të siguruar në rrugë operative se me një automjet po transportohej lëndë narkotike nga Kurbini në drejtim të Shkodrës, me qëllim trafikimin nëpërmjet kufirit jeshil drejt Malit të Zi, shërbimet policore në DVP Lezhë organizuan dhe finalizuam operacionin policor të koduar “Transportuesi”.
Në aksin rrugor Milot-Lezhë, shërbimet e Policisë kanë konstatuar mjetin e dyshuar që mund të transportonte lëndë narkotike dhe i kanë bërë shenjë të ndalonte, por drejtuesi i mjetit nuk i është bindur urdhrit të Policisë për ndalim dhe është larguar me shpejtësi duke rrezikuar jetën e punonjësve të Policisë.
Shërbimet e Policisë janë vënë në ndjeke të automjetit. Drejtuesi i automjetit ka braktisur mjetin në një servis të në fshatin Tresh, Lezhë dhe është larguar.
Gjatë kontrollit të automjetit tip “Golf” me drejtues shtetasin K. K. shërbimet e Policisë gjetën dhe sekuestruan 21 kilogramë lëndë narkotike cannabis sativa.
Po gjatë operacionit, Policia ka bllokuar edhe një automjet tjetër. Nga hetimet paraprake rezultoi se shtetasit N. T., 32 vjeç dhe Z. M.,30 vjeç, banues në Lezhë, ishin bashkautorë me shtetasin K. K dhe i paraprinin rrugën për të njoftuar shtetasin K. K në rast se do konstatonin pika kontrolli të Policisë. Të dy këta shtetas në përfundim të veprimeve u arrestuan në flagrancë për veprën penale “Prodhimi dhe shitja e narkotikëve”, e kryer në bashkëpunim.
Po në vijim të veprimeve u bë shpallja në kërkim e shtetasit K. K., 25 vjeç, banues në Barbullojë, Lezhë dhe vijon puna për kapjen e tij.
Gjithashtu, gjatë kontrollit të ushtruar në banesën e shtetasit K. K.,u gjetën dhe sekuestruan 56 gramë lëndë narkotike e dyshuar cannabis sativa.
Materialet hetimore iu referuan për veprime të mëtejshme Prokurorisë së Rrethit Gjyqësor Lezhë, për veprën penale “Prodhimi dhe shitja e narkotikëve”, e kryer në bashkëpunim.
Etiketa: aksion policor, arrestohen 2 persona, drogë, Lezhë, shpallet ne kerkim 1 person
