Caktohet masa e sigurisë “arrest në burg” për Indrit Taullain. Ky i fundit u ekstradua nga Kosova mbrëmjen e së enjtes në vendin tonë.
46-vjeçari, ish-anëtar i bandës së Durrësit, u shpall në kërkim nga GJKKO për akuzën e vrasjes me paramendimin dhe grup të strukturuar kriminal.
Ky i fundit akuzohet si i përfshirë në vrasjen e Klodian Saliut dhe Vajdin Lames, ngjarje të ndodhura në shkurt të vitit 2005.
DOSJA:
Më herët, në dosjen hetimore për ngjarjen në fjalë, janë raportuar detaje mbi mënyrën se si u organizua vrasja e Vajdin Lamajt.
Ndër të tjera, në dosjen e siguruar nga mediat, Reçi shprehet:
Ka qenë mesi i muajit shkurt të vitit 2005 kur Lulzim Berisha më ka marrë në telefon duke më pyetur nëse kisha më nga ato “nëntëshet” që janë tritol.
Bëhej fjalë për një atentat që do të përgatitej ndaj hasmit tim në Dibër. Unë nuk e bëra këtë atentat pasi pashë që ai kishte fëmijët me vete. …
Më tej, Reçi shprehet se minën e mori Indrit Taulllai dhe më pas dëgjoi se ishte vrarë Vajdin Lamaj. Në lidhje me këtë, Reçi shprehet se kishte telefonuar Lulzim Berishën, por ai i kishte thënë se për ngjarjen ka dijeni Indrit Taullai.
Reçi deklaron po ashtu se gjatë bisedave në tavolinë, Indrit Taullai është krenuar me vrasjen e Vajdin Lamajt duke thënë se “p*rdhën e madhe e kishin bërë copë-copë…“.
Reçi gjithashtu tregon se përmes një të njohuri i kishte siguruar lëndën plasëse grupit të Lul Berishës dhe një natë kishin shkuar së bashku me ta në garazhin e shtëpisë së tij për të përgatitur tritolin që do të përdorej për një vrasje.
Në dëshminë e tij, Reçi thotë se nuk e dinte për kë bëhej fjalë.
Kur kishte pyetur se çfarë vrasje do të bëhej, Reçi tregon se grupi i Lul Berishës i ishin shprehur se bomba do të vendosej në një makinë tip “Volkswagen”, e cila do të shpërthehej në momentin që do të ishte pranë një makine tjetër.
