Një student francez i vuri flakën vetes, duke fajësuar për problemet e tij financiare presidentin e vendit Emmanuel Macron, dy paraardhësit e tij, lideren e të djathtës Le Pen, Bashkimin Europian dhe mediat.
Vetëm disa orë përpara se të kryente aktin e rëndë në Universitetin e Lionit, 22-vjeçari shkroi në rrjetin social “Facebook” se nuk kishte më mundësi që të paguante detyrimet financiare prej 450 eurosh në muaj.
“Le të luftojmë kundër ngritjes së fashizmit, i cili vetëm na përçan…dhe liberalizmit që krijon pabarazi. Akuzoj Macron, Hollande, Sarkozy dhe BE për vrasjen time, për krijimin e pasigurive për të ardhmen e të gjithëve. Gjithashtu akuzoj Le Pen dhe mediat për krijimin e situatave të frikës”-shkroi studenti francez.
Mediat raportojnë se momentalisht ai ndodhet i shtruar në spital, në gjendje të rëndë shëndetësore. Ekipet e ndihmës së shpejtë bëjnë ndërkohë me dije se djali ka pësuar djegie në 90% të trupit.
