Aleanca për Mbrojtjen e Teatrit depoziton në SPAK një tjetër kallëzim penal për kryebashkiakun e Tiranës, Erion Veliaj dhe nënkryetarin e saj Arbjan Mazniku.
Juristja Adriana Kalaja tha në një prononcim për mediat se, çdo gjë që ka lidhje me ndërtimin e një teatri të ri në terrenin kur dikur ngrihej Teatri Kombëtar, është vepër penale, korruptive.
Ajo u ndal tek krijimi i shoqërisë Tirana DC – kompania e re e ndërtimit të Bashkisë Tiranë – duke e cilësuar lëvizje për të mbuluar dhe fshehur gjurmët.
“Ne e kemi parë si vepër penale. Nuk mund të krijosh një shoqëri aksionare për shërbime që nuk janë shërbime monopol siç është uji dhe dritat. Ajo që është më e papranueshme, që konsiderohet dhe nga ligji si vepër penale…njerëzit më të besuar të Veliajt janë vënë anëtarë të këshillit të administrimit, siç është nënkryetari Mazniku. Kjo është e papranueshme!
Kjo shoqëri është krijuar për interesa personale të Veliajt. Është bërë së pari për ndërtimin e veprave të ndryshme, kryesisht për ndërtimin e teatrit të ri. Veprime të tilla kërkojnë që të shmangin procedurat e tenderimit. E kemi parë si hap korruptiv, prish balancat e tregut, konkurrencën dhe ofertën.
Imagjinoni se çfarë mund të ndodhë nëse bashkitë e Shqipërisë ndërtojnë nga një firmë ndërtimi. Çdo gjë e nisur në raport me ndërtimin e teatrit të ri, është vepër penale. Ndaj është bërë krijimi i kësaj shoqërie, Tirana DC, dhe ndaj kemi kallëzuar për shpërdorim detyre, korrupsion pasiv”,– tha Kalaja.
Ky kallëzim penal vjen pas disa padive të Aleancës për shembjen arbitrare të një monumenti kulture, dhunën e ushtruar ndaj artistëve, lidhjet e funksionarëve me kompaninë që do të ndërtojë teatrin e ri, si dhe për mënyrën se si u shemb Teatri Kombëtar.
