Aktualitet

Takimi me Metën, Shehi: Duhet marrëveshje për datën e zgjedhjeve






               Publikuar në : 19:44 - 12/06/19 |
mapo.al

Përfundon takimi i presidentit Ilir Meta me aleatët e kryedemokratit, Lulzim Basha. Takimi ishte në funksion të konsultimeve të kreut të shtetit për datën e re të zgjedhjeve, pas zhdekretimit të 30 qershorit.


Për mediat foli kreu i LZHK, Dash Shehi i cili tha se është hedhur një hap i vogël para për zgjidhjen e krizës politike. Sipas tij, për caktimin e datës së re të zgjedhjeve, duhet marrëveshje e madhe politike.

“Funksioni opozitar është përtej caktimit të datës zgjedhore. Ne gjykojmë që aksioni opozitar nuk mund të reduktohet vetëm në këtë situatën e ditës së zgjedhjeve. Ne gjykojmë që data e zgjedhjeve duhet të jetë derivat i një analize tjetër. Çfarë do të bëjmë deri në ditën e zgjedhjeve për ti bërë zgjedhjet e pranueshme nga pikëpamja e pretendimeve tona. Ne gjykojmë që dita e zgjedhjeve do të derivojë nga mundësia e një marrëveshje të madhe politike në të cilën të merren në konsideratë pretendimet opozitare për të pasur zgjedhje të lira dhe të ndershme.

Ne nuk kemi tagër të mbyllim marrëveshje. Kjo i takon në radhë të parë Bashës dhe palës tjetër. Kështu që sot gjykojmë që është bërë një hap i vogël, por në drejtimin e duhur. Data e zgjedhjeve nuk është një dëshirë. Do të dalë vetvetiu nga marrëveshjet politike. Nëse data e zgjedhjeve është një shtyrje thjesht për të shtyrë kohë, kjo nuk i mjafton opozitës”, u shpreh ai.

Aleati i Bashës tha se Presidenti do të vazhdojë konsultimet edhe me partitë e tjera politike. “Edhe presidenti nuk na thërriti për një propozim konkret. Do të vazhdojnë ditë negociatat. Meta do të presë të gjitha palët e tjera, të cilat kanë edhe peshë më tepër sesa grupimi jonë, si PS dhe PD. Edhe pse e gjykon se palët janë më afër tashmë, ai thotë se nëse mazhoranca vazhdon me 30 qershorin, opozita do të përgatitet për beteja të tjera.

Nëse pala tjetër nuk ka luajtur mendsh që të vazhdojë me pretendimin e datës 30. Ndryshe të gjitha këto diskutime bien poshtë dhe s’kanë vlerë. Unë gjykoj që jemi më afër, si atmosferë, por thashë nëse pala tjetër vazhdon pretendimin se në datën 30 do bëhen zgjedhjet, kjo që jemi mbledhur këtu s’ka më vlerë dhe do të bëhemi gati për beteja të tjera që nuk do të ishin të mira për Shqipërinë”, theksoi kreu i LZHK.

Presidenti i Republikës nisi sot konsultimet për datën e re të zgjedhjeve vendore. Të shtunën, pak minuta para protestës së tetë kombëtare të opozitës, kreu i shtetit shpalli zhdekretimin e 30 qershorit si datë për zgjedhjet vendore, nisur nga kriza politike që po kalon vendi. Nga ana tjetër, kryeministri Edi Rama këmbëngul se zgjedhjet do të mbahen sipas parashikimeve kushtetuese, në 30 qershor.


Etiketa: , , ,

Pas