Ambasada amerikane në Serbi, së fundmi ka përsëritur rastin e vrasjes së vëllezërve Agron, Mehmet dhe Ylli Bytyqi.
Përmes një postimi në rrjetet sociale ambasada thekson mos veprimin e autoriteteve në Beograd, për kapjen e vrasësve të vëllezërve Bytyqi.
Vëllezërit nga Kosova që jetonin dhe vepronin në SHBA e kishin shtetësi amerikane, u vranë 22 vite më parë nga njësitë speciale të policisë serbe.
Tre shtetasit amerikanë ishin në paraburgim në Serbi, por u ekzekutuan pa gjyq e trupat e tyre u gjetën në Petrovo Sello në lindje të Serbisë – bazë stërvitore e njësisë speciale e policisë serbe që udhëhiqej nga Goran Radosavleviç i njohur si Guri.
Vëllezërit Bytyqi ishin qëlluar me plumba në kokë ndërsa duart i kishin të lidhura pas shpinës. Pas dy dekadave ende nuk është kryer hetim i plotë i këtij rasti nga autoritetet serbe.
Ambasada e SHBA deklaron vrasja e vëllezërve nuk do të harrohet, teksa kujton se detyrë e autoriteteve është të zbardhin këtë ngjarje dhe të bëjnë drejtësi.
“Drejtësi për vëllezërit Bytyqi dhe familjet e tyre, kërkojmë përgjegjësi ndaj atyre që kanë kryer dhe fshehur vrasjen e tyre dhe do të vazhdojë të mbetet një prej prioriteteve në raportet tona bilaterale me Serbinë. Qeveria e Shteteve të Bashkuara i bën thirrje autoriteteve serbe, që prej vitesh premtojnë ndihmë në këtë rast, të kryejnë një hetim të plotë. Ky rast sikur shumë tjerë, tregon nevojën urgjente që Serbia të kryejë hetimet e papërfunduara të krimeve të luftës, me qëllim të forcimit të sundimit të ligjit”, thuhet në deklaratën e ambasadës amerikane në Beograd.
Etiketa: 1999, Ambasada e SHBA, Beograd, Serbi, Vellezerit Bytyqi
