Qytetarët të shumtë, prej tyre figura publike dhe aktivistë të Shoqërisë Civile, janë organizuar përmes rrjeteve sociale për mbajtjen e një proteste para Kryeministrisë ditën e sotme në orën 17:00 kundër rritjes së paralajmëruar të çmimit të energjisë elektrike.
Por në një njoftim në faqen e saj zyrtare, Ambasada amerikane në Tiranë, teksa porosit qytetarët e saj të shmangin tubimin, e quan protestën si të Partisë Demokratike.
Ndonëse nga selia blu nuk ka lëvizje të kësaj natyre për tubim, të paktën për momentin, përveç deklarimeve mediatike nga funksionarë të PD kundër rritjes së çmimit të energjisë elektrike, gjë e cila do të rëndojë edhe më shumë xhepat e qytetarëve.
“Partia Demokratike (PD) e Shqipërisë ka njoftuar se do të zhvillojë një protestë para Kryeministrisë. Qëllimi i deklaruar është kundër rritjes së kostos së energjisë elektrike në Shqipëri. Kjo protestë mund të migrojë në vende të tjera në Tiranë, ose tubime të ngjashme mund të shfaqen në pjesë të tjera të qytetit. Kohëzgjatja e mbledhjes së pritshme është e panjohur. Qytetarët amerikanë këshillohen të shmangin çdo tubim të madh në qytet. Ndërsa shumë ngjarje të mëdha publike mund të zhvillohen në mënyrë paqësore, disa situata mund të ndryshojnë shpejt dhe në mënyrë të paparashikueshme. Monitoroni mediat lokale dhe ndiqni udhëzimet e autoriteteve vendore të zbatimit të ligjit për informacionin më të fundit”.
