Anëtarësimi i Suedisë dhe Finlandës në NATO, presidenti Meta dekreton 2 ligjet.
Dekretim ligji për ratifikimin e protokollit të Traktatit të Atlantikut të Veriut për aderimin e dy vendeve.
“Jemi të bindur se anëtarësia e tyre do ndikojë në forcimin e kontributit të përbashkët në NATO. Anëtarësimi i këtyre vendeve mike, zhvillim historik dhe ndryshim i madh strategjik”, është shprehur Meta.
Njoftim i Institucionit të Presidentit të Republikës
Presidenti i Republikës, Sh.T.Z. Ilir Meta, ka dekretuar me shpallje ligjet si vijon: – Ligj nr. 56/2022 “Për ratifikimin e protokollit të Traktatit të Atlantikut të Veriut për aderimin e Republikës së Finlandës”; dhe
– Ligj nr. 57/2022 “Për ratifikimin e protokollit të Traktatit të Atlantikut të Veriut për aderimin e Mbretërisë së Suedisë”.
Republika e Shqipërisë ka ndjekur me përparësi procedurat e brendshme ligjore lidhur me anëtarësimin e Republikës së Finalndës dhe të Mbretërisë së Suedisë në NATO.
Anëtarësimi i këtyre vendeve mike patjetër që është një zhvillim historik dhe ndryshim i madh strategjik, që mbështetet në çdo hap nga Shqipëria.
Jemi të bindur se anëtarësia e tyre do të ndikojë në forcimin e kontributit të përbashkët në këtë aleancë.
Së bashku qëndrojmë më të fortë!
