Teksa Danimarka e ka ndaluar përdorimin e AstraZeneca, kancelarja gjermane Angela Merkel ka vendosur të imunizohet me këtë vaksinë të premten.
Duket se, Merkel ka ndryshuar qëndrim.
Në mes të shkurtit, kancelarja gjermane tha publikisht se nuk do të vaksinohej me AstraZeneca nën argumentin se nuk rekomandohej për personat mbi 65 vjeç.
Ndërkohë, kreu i agjencisë së kontrollit të sëmundjeve në Gjermani ka bërë thirrje për masa “drastike”, për të frenuar valën e tretë të virusit që është duke goditur rëndë pavionet e kujdesit intensiv në disa zona.
Lothar Wieler, drejtor i Institutit Robert Koch (RKI), tha se gjermanët duhet të “zvogëlojnë në mënyrë drastike kontaktin” me njëri-tjetrin me qëllim që të shuhet vala e tretë që ka përfshirë vendin.
Mutacioni më infektiv (B117), i zbuluar për herë të parë në Mbretërinë e Bashkuar, vijoi Wieler, tani po përbën 90 për qind të të infektuarve.
