Ish-ministri i Financave, Arben Malaj është shfaqur këtë të diel në fushatën elektorale të LSI-së, në Berat. Krah kandidatit të LSI-së për deputet në këtë qark, Ardit Çelaj, teksa vijon të mbajë postin e ekspertit në Partinë Agrare Ambientaliste.
Malaj u shpreh se vendi ka nevojë për deputetë me integritet, të mirësarsimuar dhe të përkushtuar, dhe se prej 2013-s, kur sipas tij iu mbyll dera për të shërbyer me dinjitet në Partinë Socialiste, ka krijuar mundësi për mbështetjen e individëve të tillë.
“Vendi ka nevojë për deputetë me integritet, të mirëarsimuar dhe të përkushtuar. Në lista për fat të keq ka dhe modele jo pozitive, që kërkojnë mandat si deputet, por që kanë qenë më herët si kryetarë bashkie dhe jetojnë vetëm si manekinë të kryetarëve.
Më 2013, kur një derë u mbyll, që ishte ajo për t’i shërbyer PS me dinjitet, jo vasalitet, kam krijuar mundësi për mbështetjen e studentëve. Dija është një e mirë që duhet shpërndarë te të gjithë. Dija pa integritet dhe përkushtim nuk prodhon atë për të cilën ka nevojë Shqipëria e shqiptarët. Unë do ta vazhdoj këtë lloj kujdestarie bashkëpunimi me Arditin, sepse ne i kemi të gjitha kapacitetet” , – tha ish ministri socialist.
Malaj u ndal gjithashtu tek deklarata e para pak ditëve të kryeministrit Edi Rama, që punonjësit nga Banglandeshi janë më të dhënë pas punës sesa shqiptarët, dhe më pak thashethemexhinj.
“Një përgjigje edhe për kryeministrin, për Bangladeshin, mundësia e parë ju ofrohet vendasve, pastaj të huajve. Ka ardhur një moment që ne duhet të ndërgjegjësohemi që Shqipëria, e çdo zonë, duhet qeverisur me zemër dhe jo me arrogancë. Pabarazia sot është një nga sfidat më të mëdhaja që ushqen radikalizmin partiak”, – tha Malaj.
Etiketa: Arben Malaj, Ardit Cela, LSI, zgjedhjet me 25 prill
