Ish-ministri i Financave, Arben Malaj, përmes një postimi në rrjetet sociale, ka ngritur alarmin mbi borxhet e papaguara në 2018 të sigurimeve shoqërore, që arrijnë në vlerën e 14 miliardë lekë ose 110 milionë euro. Malaj thotë se duhet transparencë, pasi heshtja i bën këto institucione përgjegjëse për situatën.
“Disa institucione nuk kanë derdhur as pjesën e sigurimeve shoqërore që ju kanë mbajtur nga paga e tyre. Kjo mund të konsiderohet “vjedhje” e parave të tyre deri atëherë kur këto shuma vërtetohet se janë derdhur në sigurimet shoqërore”, shkruan Malaj në Fecbook.
Postimi i plotë:
Shteti (nuk) ka rënë. Në media është deklaruar se, në fund të vitit 2018 borxhet e pa-paguara të sigurimeve shoqërore arritën në 14 miliardë lekë ose 110 milionë euro.
Një pjesë e konsiderueshme e tij i përket pushtetit vendor. Mospagesat vazhdojnë të përkeqësohen në rreth 1100 institucione. Qartësimi i kësaj situate, transparenca maksimale me punonjësit e sektorit publik që nuk u paguhen sigurimet shoqerore, prezantimi i një plani konkret se si dhe deri kur do të shlyhen këto detyrime, qartëson në qoftë se shteti nuk ka rënë.
Kjo është një çështje sociale shumë kritike për të gjithë punjonjësit. Disa institucione nuk kanë derdhur as pjesën e sigurimeve shoqërore që ju kanë mbajtur nga paga e tyre.
Kjo mund të konsiderohet “vjedhje” e parave të tyre deri atëherë kur këto shuma vërtetohet se janë derdhur në sigurimet shoqërore. Njëkohësisht mos-pagesat fshehin defiçitin buxhetor dhe borxhin publik të një vendi, kjo prodhon paqartësi dhe pasiguri për të ardhmen.
Mospagesat cënojnë rëndë kredibilitetin e qeverisjes. Në një vend të qeverisur me përgjegjësi morale dhe ligjore sapo këto shifra të bëheshin publike, qeveria, dhe bashkitë duhet të bënin sqarim publik për saktësinë e shifrave dhe planin konkret të shlyerjes së tyre.
Heshtja i bën përgjegjës edhe ligjorë. Disa hapa të menjëhershëm duhen të ndërmerren pa vonesë:
(1) Interpelancë parlamentare me kryeministrin.
(2) Verifikim i shifrave nga KLSH.
(3) Identifikimi i drejtuesve të institucioneve që kanë shkelur ligjin duke mos paguar në të njëjtën kohë pagat dhe sigurimet shoqërore dhe penalizimi për shpërdorim detyre;
(4) identifikimi i pergjegjësisë për punonjësit e thesarit që kanë lejuar pagimin e pagave pa paguar në të njëjtën kohë sigurimet shoqërore;
(5) bllokimi i menjëhershëm i çdo shpenzimi operativ dhe i investimeve për zyra, makina, pajisje, shërbime brenda dhe jashtë vendit deri në shlyerjen e detyrimeve të prapambetura;
(6) Bllokimi i çdo shpenzimi për udhëtim e dieta për aktivitete ndërkombëtare duke e deleguar përfaqësimin në nivel ambasadori.
(7) Detyrimi i institucioneve përgjegjëse që brenda 15 ditëve të paraqesin programin e shkurtimit të shpenzimeve operative dhe afati i shlyerjes së detyrimeve të prapambetura për sigurimet shoqërore.
(8) Një analizë e thelluar për eleminimin e fryrjes së numrit të punonjësve për motive politike e nepotiste në institucionet që nuk kanë paguar sigurimet shoqerore;
(9) Qartësimi publik nga qeveria i hapave konkrete ligjore dhe administrative të ndërprerjes së mospagimit në të njëjtën kohë të pagave dhe sigurimeve shoqërore dhe të shlyerjes së detyrimeve të prapambetura brenda afateve konkrete.
Pensionistët e sotëm dhe ata të viteve të ardhshme si edhe taksapaguesit shqiptarë nuk duhen rënduar me kostot e rënda të mospagimit të sigurimeve shoqërore.
Pensionistët penalizohen nga mos rritja reale e pensioneve, taksapaguesit do të rëndohen nga rritja e taksave për të mbyllur gropën e madhe dhe në rritje të defiçitit të skemave sociale, defiçitit buxhetor dhe rritjen në nivele kritike të borxhit publik zyrtar dhe të fshehur.
(Ky reagim publik nuk shpreh qëndrim të BSH-së)
