Nga Red Varaku
Armiku më i madh i establishmentit të korruptuar shqiptar po bëhet qartësisht i dukshëm
Që nga 2016 e këtej laku duket se është ngushtuar së tepërmi në qafën e trashë të establishmentit të korruptuar që ka marrë peng Shqipërinë dhe ka bllokuar rrotacionin.
Është e qartë që tani përfaqësuesit e këtij establishmenti nuk kanë humbur vetëm legjitimitetin, por kanë humbur edhe qetësinë.
Ata e kanë kuptuar që loja e vjetër me kukulla që kanë bërë deri tani ka marrë fund. Një lojë e re, me rregulla të reja dhe lojtarë rinj tashmë është gati për të filluar.
Armiku i tyre deri dje i padukshëm ka vendosur të bëhet qartësisht i dukshëm. Kjo pikërisht tani që qytetarët janë dorëzuar dhe situata duket e pashpresë për ndryshim.
Shtetet e Bashkuara të Amerikës aleati ynë më i rëndësishëm dhe fuqia më e madhe e globit, ashtu si në 1990, është vendosur qartësisht në krah të popullit shqiptar kundër tiranisë së këtij establishmenti, i cili i maskuar si demokraci po i vjedh, po i dhunon dhe po i poshtëron më keq seç bënte regjimi që menduam se lamë pas.
Përmbysja e establishmentit që nuk u arrit në 25 prill me mjete politike, duket se do të përmbushet me mjete juridike.
Projekti për këtë ka nisur zbatimin.
“Gijotina” moderne që ata kanë ndërtuar me qëllim eliminimin e këtij establishmenti, pritet të nisë egzekutimin publik të shumë kokave të tjera, të cilat duket se kanë marrë erë dhe janë bërë si ata “qentë”, që nuk e njohin më të zotin.
Kjo me qëllim nxitjen e një krize parlamentare, që do të tentojë një fragmentarizim të mëtejshëm të grupeve parlamentare, me synim një rikonfigurim radikal të elitës drejtuese.
Fundi i tranzicionit dhe fillimi i një epoke të re për Shqipërinë është në prag. Tirania e korrupsionit do të shembet ashtu siç u shemb tirania komuniste në 1990, pavarësisht dëmeve kolaterale.
Ndryshimi do të jetë epokal!
