Arta Dade, ish-kryetare e Komisionit të Jashtëm të Partisë Socialiste dhe një nga figurat historike të socialistëve, ishte e ftuar në A2.
Dade komentoi ngjarjet e fundit të diplomacisë shqiptare, me emërimin e mundshëm të kryeministrit Edi Rama si Ministër të Jashtëm si dhe gjendjen e Partisë Socialiste.
Për Daden, Ministria e Jashtme nuk mund të konsiderohet si një “aneks i parëndësishëm”, duke shtuar që “mesa duket Rama nuk është shumë i shqetësuar për sfidat e integrimit, sepse shpesh herë përdoret për të justifikuar mosrealizimin”.
Sipas saj, sot që Maqedonia e ka zgjidhur problemin e emrit, “do të shpërblehet me hapjen e negociatave, kurse Shqipëria edhe pse ka qenë e para në këtë proces, do të mbetet e fundit”.
Gent Cakaj? Dade nuk e njeh, edhe pse e ka ndjekur në disa filmime në Bruksel, “ku mësova që ishte edhe kryenegociator për çështjen e integrimit, që është mangësi sepse kryenegociatorët duhet të jenë ekspertë nga jashtë politikës”. Sipas saj, “Genti Cakaj nuk e ka ndjekur këtë proces nga afër”.
Dade sulmoi edhe ngjarjet brenda Partisë Socialiste, ku sipas saj “nuk ka garë për të zgjedhur më të mirët”, edhe pse nuk ka keqardhje për mungesën në Parlament nga momenti që “grupi parlamentar i PS-së është më i dobëti ndër vite”.
Ajo tha se Rama po i jep një fytyrë teknike qeverisë për të treguar se është anti-establishment, edhe pse ka 21 vite në pushtet.
Sa i përket Erion Veliajt, Arta Dade tha se Rama është xheloz ndaj tij. Sipas saj, mes tyre ka rivalitet.
