“Bashkimi Evropian ka dështuar përsëri që të mbaj premtimin, t’i rrijë angazhimit dhe të jetë në qëndrimin e duhur”, tha kryeministri Edi Rama në Forumin Ekonomik në Maqedoninë e Veriu, duke ironizuar Brukselin për vendimin e mosçeljes së negociatave të anëtarësimit.
Përveç fjalës së tij, Rama ka shkëmbyer batuta edhe me përkthyesin e cili kishte probleme me përkthimin e shqipes në gjuhën maqedonase ku i thotë se “as këtë nuk e kape”, teksa edhe më herët kryeministri kishte vërejtur se fjala e tij nuk përkthehej siç duhej.
Gjithashtu, ai e ka komentuar me batutë vendimin për mos caktimin e një date për Konferencën e Parë Ndër qeveritare. “Ata thonë që na duan, por nuk janë gati për t’u martuar, në rregull ne do të shijojmë lirinë”, tha Rama.
***
Kreu i qeverisë shqiptare tha se pavarësisht asaj që ndodhi dje në Bruksel, ku Shqipëria dhe Maqedonia e Veriut u lan sërish jashtë derës së BE, bashkëpunimi mes dy vendeve do të thellohet.
“Rastësia e solli që në të njëjtën ditë kur duhej që të flisnim për atë që nuk ndodhi në Bruksel të jemi këtu në një forum të rëndësishëm ekonomik. Unë besoj që kjo është një mundësi për të thënë se çfarëdo ndodhë në apo nuk ndodh në Bruksel, ne jemi shumë të vendosur që të vazhdojmë metë gjitha forcat të risim ekonominë, mirëqenien, krenarinë dhe forcën e dinjitetit të popujve tanë.
Bashkimi evropian mund të caktoj detyra, për integrimin, mund të caktoj afate për këto detyra, mund të caktoj data por BE-ja nuk cakton dot, as vendndodhjen tonë mes Evropës, as kulturën tonë dhe identitetin tonë evropian as të ardhmen e popujve tanë si popuj evropian në familjen evropiane, në shtet evropiane, me standarde politike, institucionale, ekonomike evropiane.
Shqipëria e ka bërë zgjidhjen e saj që në kohën e Gjergj Kastriotit dhe e ka rikonfirmuar zgjedhjen e saj qysh në epokën e rilindjes kombëtare. Për shqiptarët dielli lind aty ku perëndon. Dhe e ardhmja jonë është aty ku Zoti na ka caktuar që të kemi tokën tonë, në zemër të Evropës”, tha Rama.
