Konferenca e Kryetarëve do të mblidhet ditën e mërkurë, në orën 12:30 për të diskutuar për caktimin e një date ku do të zhvillohet raundi i parë i zgjedhjes së presidentit.
Për këtë Partia Socialiste ka propozuar datën 10 maj për zhvillimin e një seance të posaçme, ndërsa Partia Demokratike ende nuk është shprehur për një datë të caktuar.
Nëse në raundin e parë asnjë prej kandidatëve nuk do të marrë 84 vota, atëherë jo me vonë se 7 ditë vijohet me raundin e dytë, i cili kërkon po aq vota sa i pari.
Palët kanë mundësi të votojnë një emër konsensual deri në raundin e 3-të, në të kundërt mazhoranca mund ta zgjedhë e vetme me 71 vota në raundin e 4-të dhe të 5-të.
Deri më tani asnjë prej grupeve parlamentare nuk ka mbështetur publikisht një kandidat të caktuar. Secili pre deputetetëve të grupit parlamentar socialist, ka propozuar 3 emra për kandidat për president, por ende nuk kanë dalë me një emër të bërë publik.
Kryeministri Rama ka përjashtuar mundësinë që presidenti i ri të jetë nga grupi parlamentar i Partisë Socialiste. Po ashtu, ka përjashtuar edhe emrin e Vali Bizhgës, drejtoreshës së kabinetit në kryeministri, një emër i lakuar nga ish-kryeministri Berisha.
Nga ana tjetër, grupi parlamentar demokrat duket se është më pas me zhvillimet, kjo edhe për shkak të zhvillimeve të fundit në Partinë Demokratike. Enkelejd Alibej drejton grupin paralamentar, ndërsa Komisioni i Rithemelimit e përjashtoi nga funksionet e partisë.
Por me mbështetjen që ka nga SHBA, si dhe pranimin nga qeveria, Alibeaj vazhdon të demonstrojë që drejton grupin paralamentar të PD-së. Përtej kësaj ai ka edhe numrat me vete, pasi pjesa më e madhe e deputetëve nuk kanë pranuar t’i bashkohen Berishës.
Përfaqësues të PS-së kanë bërë të ditur se nuk pranojnë negociata për presidentin me persona ‘non grata’, duke mirëpritur propozimet nga Alibeaj.
