Një ditë pas atentatit merret në mbrojtje Saimir Taullau. 47-vjeçarit iu bë atentat me kallashnikov në lokalin “SABA Taullau 3”, në rrethrrotullimin e Plugut në Lushnjë. Pas marrjes së mjekimit në spital ka kërkuar largimin prej andej dhe marrjen në mbrojtje nga Policia, për shkak të frikës se autorët mund ta gjenin dhe ta vrisnin pasi u shpëtoi plumbave, raporton Panorama.
Ky është atentati i dytë që Saimir Taullau i mbijeton, pasi dhe në tetor të vitit të kaluar shpëtoi vetëm me një plumb. Taullau, i njohur si kundërshtar i Aldo Bares, është larguar nga spitali i shoqëruar me forca policie dhe nuk dihet vendndodhja e tij. Ai ka marrë mjekim në spitalin e qytetit për një plagë në shpatull mbrëmjen e shkuar dhe po mbrëmë, gjatë orëve të natës është larguar nga spitali.
Mësohet se ka qenë vetë ai që ka kërkuar largimin për të shmangur ndonjë atentat tjetër në ambientet e spitalit. Policia ka shoqëruar disa persona për atentatin, por ende nuk ka persona të arrestuar. Për rastin janë marrë në pyetje dëshmitarët në lokalin ku ndodhi atentati. Dëshmitarët okularë i kanë thënë Policisë se kanë parë një motor që të largohej me dy persona.
Por ndërkohë, disa të tjerë kanë treguar se autorët u larguan me një makinë. Kjo ka bërë që Policia të dyshojë se në atentat kanë qenë të përfshirë më shumë se dy persona. Në hyrje-daljet e qytetit u ngritën pika të shumta kontrolli me qëllim kapjen e autorëve të dyshuar. Në Lushnjë shkuan dhe forca speciale nga Tirana, që janë vënë në kërkim të autorëve.
I plagosuri është një emër i njohur për Policinë dhe drejtësinë. Familja Taullau në Lushnjë njihet për konfliktin e hapur me bandën e Aldo Bares, ku këta të fundit, sipas dëshmive të dhëna në gjykatë, i kanë vendosur gjobë vëllait të tij dhe për shkak të mospagesës, mbeti i vrarë në një atentat në vitin 2005 në qendër të Lushnjës Baki Taullau. Familja Taullau ka akuzuar për këtë ngjarje bandën e Lushnjës, por ajo nuk u zbardh asnjëherë dhe ende sot nuk ka asnjë të dënuar për këtë krim.
Por nga ana tjetër, përplasjet më bandën e Aldo Bares kanë bërë që vetë Saimir Taullau të kishte lidhje me Laert Haxhiun e të tjerë persona, të cilët njiheshin si kundërshtarë të përbetuar të bandës së Aldo Bares. Madje, pas atentatit të një viti më parë, ku mbetën të vrarë dy shokët e nipit të Aldo Bares, Prokuroria ngriti dyshime se Taullau ka financuar dhe mbrojtur Laert Haxhiun pas kryerjes së krimit.
Detajet lidhur më këtë ngjarje u bazuan në përgjimet telefonike që iu bënë Taullaut, i cili doli se e kishte ndihmuar Laert Haxhiun të largohej, pasi ky i fundit, gjatë vrapimit për të shmangur Policinë dyshohet të ketë thyer këmbën.
Si nisi konflikti mes Aldo Bares dhe vëllezërve Taullau
Saimir Taullau rezulton se është pronari i lokalit, ku iu bë atentat. Ky është atentati i dytë që 47-vjeçari i mbijeton. Emri i tij nuk është aspak i panjohur për Policinë. Përveç ngjarjes së rëndë në vitin 2005 në sheshin kryesor të Lushnjës, ku pas daljes së rezultatit të zgjedhjeve parlamentare u vra vëllai i tij, Baki Taullau, vetë Saimiri është arrestuar në vitin 2015 në Durrës.
Ai u kap bashkë me Laert Haxhiun me një sasi prej 1.2 kg heroinë. Taullau u dënua me 3 vite e 8 muaj burg. Taullau dyshohet se është pjesë e një bande rivale (banda e Artur Dajës) me atë të Aldo Bares dhe mes dy bandave konfliktet kanë nisur që prej vitit 1997.
Në kohën kur Aldo Bare kishte shumë ndikim dhe kontrollin e Lushnjës në periudhën e trazirave, mes tij dhe dy vëllezërve Taullau nisi një konflikt për prishjen e pazareve të drogës. Kjo gjë çoi në vendosjen e gjobës për familjen Taullau. Mospagesa e saj dyshohet se solli dhe vrasjen e Baki Taullaut në vitin 2005.
