Aktualitet

Atentati ndaj Arjan Ndojës, arrestohet nipi i deputetit socialist














Bëni LIKE faqen zyrtare në Facebook
               Publikuar në : 11:13 - 05/11/19 |
mapo.al

Zyrtarisht prokuroria ka një person të dyshuar për atentatin ndaj prokurorit të Durrësit, Arjan Ndoja. Policia ka arrestuar një ditë më parë Redjan Rrajën, 34 vjeç, një emër ky i njohur për uniformat blu. I riu nga Fushë Kruja është nipi i deputetit socialist, Rrahman Rraja. Mësohet se ai është identifikuar nga gjurmët e ADN-së të gjetura në automjetin e braktisur pranë Sukthit.






Burime për Mapo saktësojnë se gjurmët e Rrajës janë konstatuar në maskën e gjetur në “Benzin” ngjyrë gri i braktisur pranë Ishmit, pak minuta pas atentatit. Gjithashtu, Rrajës i janë gjetur edhe gjurmë pështyme brenda në automjet. Arrestimi erdhi pas kontrolleve të ushtruara gjatë mbrëmjes së djeshme dhe paradites së sotme në banesat e Krujës të Durrësit dhe të Tiranës, me urdhër të Prokurorisë së Krimeve të Rënda.


Nga atentati i të premtes pranë mbikalimit të Shkozetit mbetën të plagosur tre persona, prokurori Arjan Ndoja, miku i tij Landi Muharremi si dhe shoferi Andi Maloku. Të tre janë jashtë rrezikut për jetën. Automjeti ku ata udhëtonin u qëllua me breshëri kallashnikovi nga një makinë tjetër.







Redjan Rraja, me profesion stomatolog, ka qenë dëshmitar i vrasjes së Elton Çiços në ish-bllok. Ai ndodhej me viktimën në të njëjtën tavolinë kur autori Jani Aliaj hyri brenda në lokal dhe qëlloi me një plumb në kokë Çiçon, duke e lënë të vdekur në vend. Atëherë Rraja u shoqërua nga policia pas ngjarjes, pasi fshehu celularin dhe pistoletën e viktimës.



Gjithashtu, emri i Redjan Rrajës doli edhe te skandali i Xhisielës, ku akuzohej për dhunë dhe përdhunim kushëriri i tij Rexhep Rraja, djali i deputetit Rrahman Rraja. Sipas denoncimit të ish-oficerit Emiljano Nuhu, Redjan Rraja i kishte drejtuar atij pistoletën duke e kërcënuar që të lirojë nga shoqërimi Rexhep Rrajën.



Njoftimi i policisë
Vihet në pranga një nga autorët e dyshuar të ngjarjes së ndodhur më datë 1 nëntor, në Durrës. Më datë 01.11.2019, rreth orës 16:13, në autostradën Durrës-Tiranë, pranë mbikalimit të Shkozetit, në ndjekje e sipër, persona të paidentifikuar duke udhëtuar me një mjet tip “Benz” kanë qëlluar me armë zjarri nga mjeti i tyre për të vrarë shtetasit A. N., 42 vjeç, me detyrë prokuror pranë Prokurorisë së Gjykatës së Shkallës së Parë Durrës, A. M., 24 vjeç dhe A. L., 46 vjeç, të cilët kanë qenë duke udhëtuar nga Durrësi në drejtim të Tiranës me mjetin tip “Benz”, të Prokurorit A. N., ku për pasojë, kanë mbetur të plagosur të tre këta shtetas.

Për zbardhjen e kësaj ngjarjeje u ngrit menjëherë një grup i posaçëm hetimor, i përbërë nga specialistë të Departamentit të Policisë Kriminale, Sektorit të Krimeve të Rënda në DVP Durrës e Tiranë, nën drejtimin e Prokurorëve të Prokurorisë për Krimet e Rënda Tiranë. Njëkohësisht, forca të shumta policie në disa Drejtori Vendore ngritën pika kontrolli dhe ushtruan kontroll të gjerë të territorit për kapjen e autorëve.

Si rezultat i kontrolleve të shpejta, në territorin e Drejtorisë Vendore Durrës, brenda një kohë të shkurtër në fshatin Shkafane, Durrës është gjetur i braktisur mjeti tip “Benz”, me targë AA342LM, që dyshohet se mund të jetë përdorur nga autorët e ngjarjes. Gjatë këqyrjes së këtij mjeti janë sekuestruar edhe prova të tjera materiale, të cilat dyshohen se janë përdorur nga autorët, konkretisht: dy armë zjarri AK 47, dy maska, një sasi lënde djegëse dhe sende të tjera.

Në vijim të veprimeve për zbardhjen e kesaj ngjarjeje, Prokuroria pranë Gjykatës së Shkallës së Parë për Krime të Rënda, regjistroi procedimin penal nr. 244/2019, për veprat penale “Vrasja e funksionarëve publikë”, “Vrasja kundër dy ose më shumë personave”, e kryer në bashkëpunim, e mbetur në tentativë” dhe “Armëmbajtja pa leje”.

Për dokumentimin ligjor të këtij procedimi penal në lidhje me autorët e mundshëm të kryerjes së kësaj ngjarje të rëndë kriminale, me qëllim zbulimin dhe sekuestrimin e provave materiale që lidhen me autorët e kryerjes së kësaj ngjarjeje, iu kërkua Gjykatës së Shkallës së Parë për Krime të Rënda lejimi i kontrollit të banesave të 11 shtetasve me banim në Krujë dhe të katër shtetasve me banim në Tiranë dhe në Lushnjë.

Si rezultat i këyre kontrolleve u gjetën dhe u sekuestruan prova materiale që dyshohet se kanë lidhje me autorët e mundshëm të kësaj ngjarjeje. Provat e sekuestruara po i nënshtrohen një analize të hollësishme nga grupi hetimor dhe një pjesë e tyre u dërguan në Laboratorin Shkencor për egzamiminm të mëtejshëm. Nga tërësia e provave të sekuestruara dhe bazuar në dyshimet e arsyeshme u bë ekzekutimi i urdhër-ndalimit të lëshuar nga Prokurori i Krimeve të Rënda për shtetasin R. Rr, 34 vjeç, lindur e banues në fshatin Nikël, Fushë-Krujë, i dyshuar si një nga autorët e mundshëm të plagosjes me armë të prokurorit dhe dy shtetasve të tjerë.

Grupi i posaçëm hetimor nën drejtimin e Prokurorëve të Krimeve të Rënda po vijojnë intensivisht punën për zbardhjen e plotë të kësaj ngjarjeje, identifikimin dhe kapjen e autorëve të tjerë të përfshirë në këtë ngjarje. Policia e Shtetit dhe Prokuroria e Krimeve të Rënda kërkon mirëkuptimin e medias që të tregohen të kujdesshëm në dhënien e informacioneve për publikun, të cilat cënojnë vijimin e hetimeve. Policia e Shtetit në bashkëpunim të ngushtë me Prokurorinë e Krimeve të Rënda është tërësisht e angazhuar për zbardhjen e plotë të kësaj ngjarje.

Policia e Shtetit fton qytetarët që të telefonojnë në 112 apo Komisariatin Dixhital për çdo informacion të mundshëm për këtë ngjarje dhe për çdo paligjshmëri tjetër, duke ju garantuar anonimat të plotë dhe reagim të shpejtë e të paanshëm.

LEXO EDHE:  

Atentati ndaj prokurorit, Policia: Si ramë në gjurmët e Redjan Rrajës

Atentati ndaj Prokurorit dhe “Xhisela”/ Kush është Redjan Rraja

Katër identitetet e “Rrumit”, përdorte edhe mbiemrin Dako

1


Etiketa: , , , ,

CLOSE
CLOSE
Pas