Ngjarja që ka bërë jo pak bujë në mediat tona, për shkak se shoqëria e ka më të lehtë të kryqëzojë viktimat, nuk ka mbetur jashtë vëmendjes së Avokates së Popullit.
Erinda Ballanca, gjatë fjalës në Komisionin e Ligjeve, u ndal tek historia e 20-vjeçares nga Librazhdi që u dhunua dhe u filmua nga vjehrri dhe vjehrra, pasi e gjetën në banesë me një burrë tjetër.
Ballanca tha se shoqëria shqiptare është e dhunshme dhe duhet të marrë fund vlerësimi i personave për shkak të gjinisë së tyre.
“Shoqëria shqiptare vazhdon të mbetet shoqëri e dhunshme. Unë që vitin e parë në fjalën e drejtuar Kuvendit kam deklaruar se dhuna do të sjellë një ashpërsim të gjuhës edhe në nivele të tjera te të rinjtë. Nuk jemi rritur në një ambient të tillë dhe prapë jemi bërë të dhunshëm.
Vazhdon të mbetet i ulët niveli i kuptimit të tjetrit për mendimin e tij ndryshe. Për rastin e djeshëm mendoj se është rast i turpshëm, është një rast që na tregon se duhet të marrë fund vlerësimi i personave në përgjithësi dhe grave në veçanti për shkak të seksualitetit të tyre. Gjithçka ne jemi sipas shoqërisë shqiptare formëzohet nga seksualiteti”, tha Ballanca.
