Kryetari i Bashkisë së Vaut të Dejës, Mark Babani pranoi se ka qenë emigrant në Itali, por nuk është arrestuar dhe as dënuar asnjëherë. Ai tha se nuk ka ndërruar kurrë emrin dhe se dokumentet e PD-së janë sajesa. “Unë se kam patur kurrë emrin Saimir. Ndërsa mbiemrin e kam ndryshuar dhe e kam deklaruar këtë fakt”, tha ai në një reagim për mediat, pasi Gazment Bardhi publikoi dokumentet për dënimin e tij në Itali.
“E gjithë kjo histori është e sajuar. Është një histori që nuk ka lidhje me mua. Unë deklarimet i kam pasur shumë të qarta. Ato nëse kanë prova mund të shkojnë në prokurori. Absolutisht nuk ka lidhje me gjurmët e gishtërinjve të mi.
Unë jam i gatshëm që të shkoj në Prokurori dhe të jap shenjat e gishtave. Normalisht ata do sajojnë që të më ulin imazhin. Më 4 prill 1994 kam qenë në hotel dhe kam qenë në punë. Unë në jetën time nuk kam qenë kurrë as i arrestuar dhe as i ndaluar nga policia, kurrë. Kam aktivizuar avokatët e mi, që të bëjnë padi për shpifje ndaj Gazmend Bardhit”, vijoi Babani.
Kujtojmë se në një deklaratë për mediat, mesditën e sotme, Bardhi deklaroi se: “Mark Babani, me emrin e rremë Marq Babaj, është arrestuar më datë 4 Prill 1994, në Itali, në zonën e Siçilisë, për kryerjen e veprës penale “Vjedhje në rrethana rënduese, e kryer në bashkëpunim”.
LEXO EDHE:
Dalin dokumentet/ PD: Babani i dënuar në Itali për vjedhje makinash
