Pas rikthimit të energjisë elektrike në Kuvend, ministrja e Energjisë dhe Infrastrukturës Belinda Balluku ka replikuar me deputetin demokrat Helidon Bushati.
Ky i fundit kërkoi transparencë ndërsa i bëri thirrje qeverisë të heqë taksën e qarkullimit. “Diskutoni me kryeministrin dhe vendosni rikthimin e taksës vetëm prej 7 lekësh. Kopjuat edhe fashat e energjisë. Ulni taksën e qarkullimit. Hiqni taksën e qarkullimit fare.
Justifikimi juaj se me çfarë do mbushet buxheti i shtetit, kjo bëhet duke ndalur hajdutërinë. Qëparë përmenda edhe një fakt. Faktin e anijeve që e proklamuan me të madhe se kush do ishte edhe subjekti”, tha Bushati.
Në replikën e saj ministrja tha se procedurat kanë qenë transparente ndërsa me ironi shtoi se nuk është problemi i tyre pse demokratët nuk i duan kompanitë amerikane.
“Kryeministri ka një detyrë më të rëndësishme se sa të merret me fjalët tuaja boshe po ju përgjigjem unë. Jeni një tufë burrash që bërtisni. KESH ka publikuar thirrjen e shprehjes së interesit të marrjes me qira. Dëshirat tuaja apo mospranimi juaj ndaj kompanive amerikane në Shqipëri nuk na shqetëson fare”, u shpreh Balluku.
