Barcelona ka si objetiv të merkatos së verës për të përforcuar mbrojtjen Luke Shaw të Manchester United, raporton SuperSport.
Lajmi konfirmohet nga e përditshmja angeleze “The Sun”, që e lidh këtë transferim të mundshëm me problemet që po has mbrojtësi nën urdhrat e Jose Mourinhos.
Futbollisti i Përfaqësueses së “Tre Luanëve”, i cili është aktivizuar në vetëm 7 ndeshje në Premier League në këtë sezon, po mendon të ndryshojë ambient, pasi e ka të qartë se me portugezin në stol hapësirat për të do të jetë të kufizuara.
“Blaugranat” kërkojnë të përfitojnë nga rasti jo për ta blerë kartonin e tij, por për ta marrë mbrojtësin në formë huazimi për një vit.
Në fakt, drejtuesit e Barcelonës janë të kushtëzuar për të kërkuar këtë formulë, sepse nuk mund të shpenzojnë shuma të mëdha në merkato, pasi vetëm për Coutinhon u detyruan të derdhnin në arkat e Liverpoolit plot 105 milionë stërlina. Luke Shaw, pavarësisht moshës së re, ka fituar eksperiencë dhe mund ta ndihmojë shumë ekipin katalan në fazën mbrojtëse, ku Vermaelen nuk u ngjit kurrë në lartësinë që kërkon ky klub i madh.
