Dështimi i Edi Ramës në 8 vite qeverisje dhe humbja e pushtetit më 25 prill. Këto janë arsyet që kanë shkaktuar nervozizëm tek ministrja për Marrëdhëniet me Parlamentin, Elisa Spiropali, thotë Sekretari i Përgjithshëm i PD-së, Gazment Bardhi.
Ai i referohet reagimit të saj në lidhje me padinë që Partia Demokratike ka depozituar në SPAK kundrejt kryeministrit Edi Rama dhe 15 ministrave, për përdorim të funksionit publik për interes personal.
Në një postim në “Facebook”, Bardhi shprehet se Spiropali është në të drejtën e saj të nervozohet sepse është në dijeni për përballjen me drejtësinë, së bashku me kryeministrin Edi Rama dhe të tjerë ministra.
“Elisa Spiropali, Edi Rama dhe çeta e tij janë në shkelje të ligjit. Ata do të japin llogari për thirrjen me dhunë të administratës në takimet e PS, përdorimin e lejeve të legalizimit apo procesit të rindërtimit për qëllime elektorale, si dhe për abuzimin me pushtetin dhe paratë që u kanë vjedhur shqiptarëve këto 8 vjet”, – shkruan Bardhi.
“Elisa Spiropali e di se gjuha e padenjë në facebook dhe hetimi nga SPAK janë dy gjëra të ndryshme, prandaj është nervoze”, – vijon Sekretari i Përgjithshëm i PD-së.
Postimi i Gazment Bardhit në “Facebook”:
Dështimi i Edi Ramës në 8 vite dhe humbja e pushtetit është arsyeja e nervozizmit të Elisa Spiropalit!
Ka të drejtë që nervozohet! SPAK ka punë me të PARA dhe PAS ZGJEDHJEVE TË 25 PRILLIT. Elisa Spiropali, Edi Rama dhe çeta e tij janë në shkelje të ligjit. Ata do të japin llogari për thirrjen me dhunë të administratës në takimet e PS, përdorimin e lejeve të legalizimit apo procesit të rindërtimit për qëllime elektorale, si dhe për abuzimin me pushtetin dhe paratë që u kanë vjedhur shqiptarëve këto 8 vjet.
Elisa Spiropali e di se gjuha e padenjë në facebook dhe hetimi nga SPAK janë dy gjëra të ndryshme, prandaj është nervoze.
Kjo kohë e vështirë i ka bindur shqiptarët se politikanë si Edi Rama apo Elisa Spiropali mendojnë vetëm për vete, duke vrarë shpresën dhe mundësitë për shqiptarët. Kjo është arsyeja pse të rinjtë braktisin vendin, pse ekonomia është në krizë, pse shëndetësia është në kolaps, pse numri i të papaunëve është rritur. Njerëzit nuk duan të jetojnë në një kënetë, ku mbyten nga pak çdo ditë. Njerëzit duan ndryshim dhe PD është gati për ndryshimin!