Lulzim Basha është shprehur se Sali Berisha është përjashtuar si anëtar i grupit parlamentar dhe si anëtar i Këshillit Kombëtar, ndërsa ka shtuar se rrugët e tij me organet drejtuese të PD janë të ndara.
Ai thotë se me veprimet që ka bërë së fundmi, lideri historik i PD është vetëpërjashtuar, ndërsa shton se Berisha do të jetë anëtar i PD deri sa të gjykohet se dëmton rëndë interesat politike dhe morale.
Sjelljet e Berishës, Basha i ka konsideruar qesharake.
Lulzim Basha: Sali Berisha është përjashtuar si anëtar i grupit parlamentar, si anëtar i Këshillit Kombëtar, për shkak të vendimit të Kuvendit Kombëtar. Rrugët e Sali Berishës me organet drejtuese janë të ndara. Me veprimet e tij është vetë përjashtuar. Sa herë hip e zbrit shkallët nga selia është puna e tij. Detyra jonë është që çdo demokratë që ka interesat e PD dhe sakrificat e tij apo të saj të shenjtë, të jemi të bashkuar ndaj regjimit të Edi Ramës, që është burim i çdo të keqeje. Berisha mund të thërrasë protesta kundër Blinken, kundër kujto që mendon ai, mund të krijojë organizata me drejtim anti-amerikan. Mund të bëjë ç’të dojë, por nuk do jetë më pjesë e organeve drejtuese të PD. Është i përjashtuar për shkak të vendimit të Kuvendit Kombëtar. Do të jetë anëtar, deri sa të gjykohet se ai dëmton rëndë interesat politike dhe morale.
Deri tani sjellja e tij është qesharake. Vendimi që kemi marrë është që të mos lejojmë më shfokusim, por të fokusojmë të gjithë energjitë tona, të organizojmë të gjithë potencialin e nevojshëm, dhe të përgatisim betejën frontale me regjimin që po ia bënë jetën ferr shqiptarëve, qeverinë e Edi Ramës.