Një ditë pas protestës para kryeministrisë, ish-kryeministri Sali Berisha i shoqëruar nga deputetë e mbështetës të tij shkoi në selinë PD për të mbajtur një takim me Komisionin e Rithemelimit të PD. Kur gjetën derën e sallës ku mbahen mbledhjet e kryesisë së PD-së të mbyllur një mbështetës I Berishës e shkelmoi dhe e hapi. Kjo mbledhja u mbajt ndërsa në një sallë tjetër Basha kishte takim me anëtarë të kryesisë e deputetë demokratë.
“Më vjen keq se kjo ngjarje e meritonte të ndodhte tek partia e drogës dhe e krimit që është partia që qeveris vendin por ja që trekëndëshi i Bermudes na shfaqet sërish” tha Basha duke komentuar ngjarjen për të cilën tha se autor ishte Fatjon Dautaj, sipas tij person i shpallur në kërkim nga autoritetet britanike për trafik droge.
“Dje pamë një “non grata” para kryeministrisë dhe një që pritet të shpallet non grata që nuk ishin marrë as masat e vogla të sigurisë sepse janë sintoni me njëri tjetrin se i lidh halli personal.”
Më tej Basha i bëri thirrje Sali Berishës të lexojë mirë vendimin e Kuvendit të PD-së
“Një ish deputet i PD-së që nuk është anëtar i asnjë strukture të PD-së është futur me ndihmën e familjarëve të tij e kriminelëve të skeduar nga Britania e Madhe për të thyer dyert dhe zhvendosur vëmendjen e fokusin e PD-së nga e vetmja detyrë që ne kemi të fokusohemi e mbrojmë njerëzit nga korrupsioni i Edi Ramës.“ tha Basha
Hyrjen në selinë e PD-së të Sali Berishës, Basha e quan dëshpërim për shkak të protestës së djeshme para kryeministrisë të cilën e quajti dështim.
“Dëshpërim se nuk është pakicë por i vetëm”.
