Kryetari i PD, Lulzim Basha denoncoi sot gjatë një konference për shtyp nga selia blu, buxhetin e shtetit për vitin 2021.
Basha tha se qeveria ka parashikuar pagesa në majme për incineratorët gjatë vitit të ardhshëm ku vlera e pagesave është rritur nga 7 në 11 mln euro. Milionat, tha Basha, shkojnë për koncesionarët, por asnjë lek për qytetarët nga të cilët 100 mijë persona kanë humbur vendet e punës nga pandemia vetëm muajt e fundit.
“Mbi 100 mijë shqiptarë kanë humbur vendin e punës, asnjë masë ekonomike, asnjë masë shëndetësore. Afera qindra miliona euroshe nuk mund të bëhej pa aprovimin e Edi Ramës. Nuk do të censurohej informimi i qytetarëve, nuk do të pengohej hetimi i drejtësisë nëse pas kësaj afere nuk do të qëndronte Edi Rama. Në buxhetin e 2021, inceneratorit të Tiranës i rritet pagesa nga 7 në 11 milion euro.
Buxheti i 2021 është i pavlefshëm, akti i fundit i një qeverie pa legjitimitet. Kushdo që e sheh veten në këtë Buxhet, duhet ta ndjejë veten fajtor. Çdo qindarkë që kjo bandë e babëzitur ka grabitur do t’i merret e do t’u rikthehet shqiptarëve. I bëj thirrje çdokujt që ka ndërmend të hyjë në një marrëdhënie kontraktuale me shtetin në katër muajt e fundit të pushtetit, të ketë kujdes. Zotërinj të SPAK, kur ju nuk hetoni, por mbroni, të korruptuarit, ju inkurajoni vijimin e plaçkitjes së shqiptarëve. Edi Rama është i mbaruar. Opozita do fitojë thellë zgjedhjet dhe do ti kthejë shpresën shqiptarëve”, u shpreh Basha.
Kreu i PD u ndal konkretisht te incineratori i Elbasanit i cili sipas tij nuk funksionon, por përkundër kësaj planifikon të marrë 148 milionë dollarë ditët e fundit.
“Gjendja inceneratorit të Elbasanit i ngjan një burgu mafioz. Në ditët e tij të fundit planifikon të marrë 148 milionë dollarë nga xhepat e shqiptarëve. Kjo aferë përball çdo shqiptar me nje bandë që vjedh në kohën e pandemisë”, vijoi Basha.
Ai kërkoi reagimin e SPAK për hetuar dhe vënë para përgjegjësisë ligjore këdo që ka firmosur kontrata abuzive, sipas tij.
“Policia dhe Prokuroria japin informacione të hollësishme për çdo krim ordiner; për aferën e inceneratorëve asnjë informacion. Mos hetimi i SPAK, inkurajon hajdutët të vjedhin më shumë”, tha ai.
LEXO EDHE:
Etiketa: Buxheti i Shtetit, Incineratoret, koncesionet, Lulzim Basha, SPAK, Video
