Kryetari i Partisë Demokratike, Lulzim Basha paralajmëroi kryeministrin Edi Rama se, do të ngarkohet me përgjegjësi penale në rast se nuk do të mbështesë financiarisht shqiptarët të prekur nga pandemia Covid-19 dhe tërmeti shkatërrimtar i 26 nëntorit.
Në një konferencë për mediat nga selia blu, Basha siguroi se do ta dërgojë Ramën në dyert e Gjykatave, nëse vijon të jetë i papërgjegjshëm kundrejt qytetarëve në nevojë ekonomike.
“Paratë janë, por paratë po vidhen! Kriza aktuale nuk përballet me llafe! As me teatro të dala mode! I kam propozuar një plan konkret. Ky nuk e bën, nuk i nxjerr fondet nag Buxheti, nuk anulon asnjë koncension, as në kulmin e pandemisë.
A është kjo diçka e re?! Edhe në një situatë si ajo e tërmetit, nuk ndalon vjedhjen. Shqiptarët janë akoma në çadra. Ishim bashkë para disa ditësh në Kurbin, në Durrës. Akoma në çadra, me shiun që u futet brenda, pa asnjë ndihmë ushqimore prej muajsh.
Në mes të pandemisë ky bën tendera sekret! Tendera sekretë në mes të pandemisë! Kemi 6 muaj që kemi bërë kallëzimin penal dhe atje nuk lëviz asgjë, po kjo është çështje tjetër. Kemi një kryeministër edhe një qeveri që është e vendosur të injorojë nevojat akute të shqiptarëve dhe të vazhdojë vjedhjen.
Ky është një problem i madh që unë zotohem të bashkohem me shqiptarët për ta zgjidhur në 25 prill. Por nuk pret koha deri në 25 prill. Nëse këto dy javë i jam drejtuar me civilitet, sot i them se moszbatimi i planit me 5 pika, që është përgjigja e duhur në kushtet aktuale…
Moszbatimi i këtij plani e ngarkon Ramën me ministrat e tij me përgjegjësi penale dhe çdo dëm në ekonomi e shëndetësi të vendit nesër nuk do të jetë thjesht një problem i madh për qytetarët, një përgjegjësi vetëm politike e këtyre që kemi akoma për 6 muaj, por e siguroj që do të ndiqet si përgjegjësi penale!”, – tha kryedemokrati Lulzim Basha.
