Ish-kryetari i Partisë Demokratike, Lulzim Basha, edhe pse nuk është më aktiv në skenën politike, ka reaguar për çështjet që ka mbrojtur në kohën kur ishte drejtues i opozitës.
Përmes një postimi në Facebook, Basha ka përkujtuar shembjen e Teatrit Kombëtar, duke e cilësuar një plagë të hapur në zemër të Tiranës, si dhe një simbol i 9-viteve arrogancë, korrupsion, klientelizëm dhe armiqësi të tërbuar ndaj trashëgimisë kulturore.
“Sot ai shesh, i zhveshur dhunshëm nga historia e tij, është një tjetër vijë ndarëse midis qytetarëve që duan një Shqipëri demokratike dhe një pakice që shkatërron, plaçkit, uzurpon një nga institucionet më të shenjta të kombit.
Mirënjohje të thellë për artistët, qytetarët dhe qëndrestarët që nuk u pajtuan kurrë me marrëzinë e një regjimi që dialogun e kryen me fadroma dhe dhunë shtetërore. Gjykata Kushtetuese provoi se beteja në mbrojtje të Teatrit Kombëtar ishte e drejtë dhe tani është koha që drejtësia të shkojë deri në fund, duke nxjerrë përpara përgjegjësive ata që barbarisht sulmuan kulturën, qytetarinë dhe trashëgiminë tonë të përbashkët”, shkruan Basha.
