Basha: Tani po e njoh Berishën, pa statut s’jemi parti por xhungël

Në një intervistë për News24, kryetari i PD, Lulzim Basha ka komentuar zhvillimet më të fundit mes demokratëve. Ai u shpreh se vetëm tani po e njeh Sali Berishën, pasi deri më tani ka pasur një vello që e ka penguar. Basha kujtoi shprehjen e një miku, që; nëse do ta njohësh Berishën, duhet ta kesh përballë. Lidhur me kërkesën për mbledhjen e Kuvendit Kombëtar, kreu i PD pohoi se duhet të zbatohet statuti.

“Për mua nëse aty ka 5 – 50 apo 500 firma të vlefshme, nuk janë firma, nuk janë letra, por janë demokratë dhe është detyra ime si kryetar i PD, të garantoj që të gjithë secila prej tyre të verifikohet sipas statutit, që është libri themeltar që mban bashkë demokratët. Është kushtetuta që kanalizon vullnetin e cdo demokrati, mbron të drejtat e cdo demokrati është ajo që mundëson funksionim e PD, si një parti demokratike si kudo në planet. Pa funskionimin e statutit jemi në xhungël”, tha Basha.

Ai shtoi se kjo e Berishës, është hakmarrje ndaj tij. Sipas Bashës, lideri historik nuk e mbajti fjalën që të mos e përfshinte PD në betejën e tij.

“Me atë që ka bërë këto dy muaj ka treguar qartë se atë që e ka nisur si lëvizje për gjoja demokraci, e ka sebep. Hakmarrje ndaj meje, mund ta them me gojën plotë. Ai se ka luftën me mua as për demokracinë e brendshme të PD, por me SHBA-të. Vendimi ka ardhur nga SHBA-të, të cilët e kanë përcaktuar si non-grata, të padëshirueshëm politikisht. PD nuk mund të jetë dhe nuk mund të funksionojë si mburojë për një person të shpallur non-grata, secildo qoftë ai”.

Basha tha se vendimin për përjashtimin e Berishës nga Grupi Parlamentar, e mori duke ushtruar detyrën dhe përgjegjësinë e tij.

“Jam një kryetar i zgjedhur sipas statusit me parimin një anëtar një votë. Ky nuk është privilegj, por përgjegjësi. Përgjegjësia që merret nga anëtarësia, është që lidershipi të marrë vendime të tilla, te bazuara në statut dhe rregullorja, të miratuara kur Berisha ka qenë anëtar i PD. S’mundet kurrsesi që të ishte një akt lidershipi që të vendosja cilindo forum, kryesi, para zgjedhjeve që nuk është zgjedhje mes SHBA dhe Sali Berishs. Është barra e lidershipit, arsyeja se pse demokratet e zgjedhin kryetarin me këtë parim. Kjo rregullore është miratuar në 2018-ën”, deklaroi Basha.