Lulzim Basha, në një deklaratë për mediat, para se të futej në parlament, u shpreh se KLGJ dhe KLP janë të kapura nga socialistët.
Por sipas tij, te vetingu ka garanci nga ndërkombëtarët, duke shtuar se do t’i japin një shans drejtësisë të korrigjohet.
“Sot nuk është drejtësia që duam, por do të ishte më keq nëse një proces i nisur me qëllim që të përfundojë me një drejtësi që ndëshkon politikanët e korruptuar, do të mbetej në mes dhe po kështu do të ndërpritej integrimi i vendit në BE. Prandaj, ne po bëjmë atë që kemi thënë.
Për hir të integrimit, do t’i japim shansin një drejtësie që të korrigjohet dhe t’u hedhë prangat çdo qytetari shqiptar që shkel ligjin, duke e nisur nga më të pushtetshmit. KLGJ dhe KLP janë të kapura nga socialistët, të paktën te vetingu kemi garanci nga ndërkombëtarët”, tha Basha.
Para nisjes së seancës, Basha zhvilloi mbledhje me anëtarët e grupit parlamentar të PD.
