Fundi dhe fillimi i javës së dytë të majit e tronditi Shqipërinë. Protesta e 11 majit dhe më pas ajo e datës 13, treguan se zemërimi i opozitës është shumë i madh. Pamjet që bënë xhiron e botës bënë që opozita të thërrasë një tjetër protestë për të shtunën e fundit të muajit.
Ndërkohë, prej asaj kohe, gjërat kanë nisur të lëvizin sidomos në planin ndërkombëtar.
Dy deputetë të rëndësishëm gjermanë kanë bërë thirrje për dialog, ku nuk përjashtohet as shtyrja e zgjedhjeve. Ata thonë se janë të gatshëm për të ndërmjetësuar.
Ditën e protestës, gjuha e ndërkombëtarëve në Tiranë është kundër dhunës, por ata u bëjnë thirrje për vetëpërmbajtje.
“Shtetet e Bashkuara nxisin të gjitha palët të tregojnë vetëpërmbajtje, të refuzojnë dhunën dhe të përfshihen në një dialog konstruktiv,” thuhet në deklaratën e SHBA.
Interesant është reagimi i ambasadave të vendeve të BE në Tiranë, ku thuhet se ka një ofertë ekzistuese për dialog.
“Për të mirën e qytetarëve shqiptarë, shumica e të cilëve dëshiron të shohë që vendi të bëjë përpara me procesin e reformave dhe të ecë drejt anëtarësimit në Bashkimin Evropian, ne i bëjmë thirrje të gjitha palëve të mbështeten në ofertën ekzistuese për dialog me synimin për të gjetur një rrugëdalje nga situata aktuale politike si një çështje urgjente,” thuhet në deklaratën e shpërndarë nga zyra e delegacionit të BE.
