Një 35-vjeçar me incialet B.A, ka rënë në prangat e policisë së Tiranës pasi bënte manovrime të rrezikshme në rrugën “Dritan Hoxha” me një automjet tip “Mercedes Benz”.
Ai nuk i është bindur as urdhrit të policisë për të ndaluar, ndërsa gjatë ndjekjes mësohet se ka bërë aksident, duke u përplasur me një automjet tjetër. B.A është ndaluar në rrugën Ibrahim Rugova nga patrulla e Policisë Rrugore.
35-vjeçari ka rezultuar në gjendje të dehur në timon, ndërsa gjatë kontrolleve i është gjetur edhe një sasi lënde narkotike kanabis.
Njoftimi i Policisë
Alkool dhe drogë në timon, prangoset 35-vjeçari që nuk iu bind Policisë dhe shkaktoi aksident gjatë ndjekjes.
Rrugorët e kryeqytetit, pasi kanë marrë një njoftim nga qytetarët se një automjet po bënte manovra të rrezikshme në rrugën “Dritan Hoxha”, menjëherë vlerësuan telefonatën dhe informacionin e dhënë duke u vunë në ndjekje të automjetit, drejtuesi i të cilit sapo ka parë patrullën e Policisë Rrugore, jo vetëm që nuk i është bindur shenjës së ndalimit, por ka shtuar shpejtësinë duke aksidentuar një automjet tjetër në lëvizje dhe duke rrezikuar edhe përdoruesit e tjerë të rrugës.
Ndjekja e automjetit ka vijuar nga patrullat e tjera të Policisë Rrugore, të cilat kanë arritur të ndalojnë dhe neutralizojnë drejtuesin e automjetit në rrugën “Ibrahim Rugova”, pa shkaktuar pasoja për përdoruesit e tjerë të rrugës. Nga verifikimi me aparatin alkooltestues rezultoi se drejtuesi i automjetit, shtetasi me iniciale B. A., 35 vjeç, ishte në gjendje të dehur në masën 0.66 mg/l testi i parë dhe 0.65 mg/l testi i dytë. Gjithashtu, gjatë kontrollit personal, këtij shtetasi iu gjet një sasi e vogël lënde narkotike e dyshuar canabis sattiva.
Në përfundim të veprimeve u bë arrestimi në flagrancë i shtetasit B. A., 35 vjeç, banues në Tiranë, për veprat penale “Drejtimi i mjetit në mënyrë të parregullt” dhe “Prodhimi dhe shitja e narkotikëve”.
Etiketa: Bënte drifting në rrugë, i dehur ne timon, Video
