I pranishëm në ceremoninë e nderimit të Azem Hajdarit, të organizuar nga shoqata ‘Dhjetor 90, gjatë një deklarate për mediat ish-kryeministri Sali Berisha u shpreh se do ta kthejë PD në rrugën e duhur.
Duke folur për vendimin e Bashës, ish-kryeministri Berisha deklaroi se demokratët dhe drejtuesit do të dinë ta hedhin në kosh atë vendin anti statutor.
Fjala e ish-kryeministrit Sali Berisha
Erdha për tu përulur me nderimin më të thellë para veprës së pavdekshme të tribunit legjendar të revolucionit demokratik të Dhjetorit ’90, udhëheqësit të lëvizjes studentore, prijësit të asaj lëvizje, Azem Hajdarit dhe sivllaut të tij në ideale, në besnikëri, Besim Çerës, të cilët u ekzekutuan këtu 23 vite më parë nga falangat me uniformë të qeverisë së PS.
Azem Hajdari do jetojë përjetë si një simbol i kurajo dhe guximit të jashtëzakonshëm njerëzor. Do frymëzojë të rinjtë shqiptarë në çdo kohë, për të qëndruar në mbrojtje të lirisë dhe vlera të saj. Askush në histori si individ nuk ka bërë për lirinë e shqiptarëve aq sa ka bërë Azem Hajdarit me guximin e tij dhe studentët liberatorë të Dhjetorit ’90.
Por nderimi sot i figurës së Azem Hajdarit merr dhe një domethënie më të madhe se asnjëherë. Shqipëria ndodhet në gjendjen më kritike të saj, në fakt po kështu edhe Partia Demokratike. Ndaj dhe është në nderin, detyrën e demokratëve, demokrateve kudo që janë të ngrihen, të ngrejnë kokën lart. Trashëgimnia e tyre e shkëlqyer do të ju japë nder dhe frymëzim demokratëve në çdo kohë.
Natyrisht një poshtërim i pandëgjuar dhe paparë ndonjëherë në historinë e partisë së lirive, të drejtave ligjore dhe interesit kombëtar siç është PD, ka ndodhur dhe jam i sigurtë se anëtarët, mbështetësit drejtuesit e të gjitha niveleve të PD, do të dinë të hedhin në koshin e plehrave vendimin anti-statutor, antiligjor, antidemokratik të atij që sot është në krye të PD, por që dëshmon se mbi këtë tokë ka vetëm një interes, atë të vetin personal.
Ndaj dhe merreni këtu, këtë prani sot edhe si një zotim para tribunit tonë legjendar që ne, PD-në do ta ngrejmë në piedestalin që e ngriti ai me shokët e tij, që demokratët nuk ka forcë në botë që ti mposhtë ata, por do ngrihen dhe të ecin të sigurtë, më të bashkuar se kurrë, më të vendosur se kurrë për të përmbysur regjimin e drogës, krimit, vjedhjeve, regjimit e pazareve dhe të kakistokracisë.
