Menjeherë sapo u dha vendimi në KPA për shkarkimin e tij, Besnik Muçi ka dhënë një prononcim për mediat. Ai deklaroi se nuk e njeh vendimin e Kolegjit të Posaçëm të Apelimit, sepse është vlerësuar si prokuror dhe jo si anëtar i Gjykatës Kushtetuese.
“Vendimi i KPA nuk afekton funksionin tim të Gjykatës Kushtetuese. Neni 130 i Kushtetutës thotë qartësisht se funksioni i anëtarit të Gjykatës Kushtetuese është i papajtueshëm me çdo vendim tjetër. Në momentin që kam bërë betimin ka përfunduar statusi im si prokuror. KPA nuk ka kompetencë mbi anëtarin e Gjykatës Kushtetuese. Unë do vazhdoj detyrën, deklaroi Muçi.
Pjesë nga deklarata:
“Unë e kam thënë jam bërë prokuror vetë, kam konkuruar dhe kam ushtruar profesionin për 17 vite duke respektuar ligjin. Mëkati i vetëm që bëra para 2 vitesh, të nderuar të gjithë ata zotërinj janë marrë me analizën e rastit tim, mëkati i vetëm është se aplikova për anëtar të gjykatës Kushtetuese. Mëkatin tjetër e bëri Dvorani, më listoi të tretin në listë, mëkatin e katërt e bëri Presidenti që më emëroi anëtar të Kushtetuese. Tani ku qendron problemi im në këtë situatë, çfarë mund të bëj një prokuror, që ka punuar për vendin e tij dhe kërkon të bëjë karrierë duke respektuar në mënyrë maksimale të gjitha procedurat.
Unë tani po përpiqem të analizoj vendimin e KPA. Vendimi nuk afekton funskionin tim si anëtar të Gjykatës Kushtetuese. Kolegji nuk mund ti shtrijë kompetencat në Gjykatën Kushtetuese. Që do të thotë, se në momentin që unë kam bërë betimin te Presidenti e kam humbur statusin e prokurorit. Kolegji nuk ka pasur kompetencë për çështjen time. Në momentin që ka përfunduar statusi im si prokuror unë nuk jam më subjekt, KPA nuk ka kompetencë mbi anëtarin e Gjykatës Kushtetuese”.
