Aktualitet

Bie mbështetja e publikut për Presidentin Biden














Bëni LIKE faqen zyrtare në Facebook
               Publikuar në : 16:36 - 13/10/21 |
mapo.al

UASHINGTON – Amerikanët po shprehin pakënaqësitë e tyre ndaj Presidentit Joe Biden, pothuajse nëntë muaj pasi ai mori detyrën.






Në një seri anketimesh të bëra javën e kaluar në nivel kombëtar, 49.2% e të anketuarve nuk e miratojnë punën e zotit Biden, përkundër 44.5% që e miratojnë, thotë kompania e anketimeve FiveThirtyEight. Rezultatet e pesë anketimeve të bëra rishtazi nga RealClearPolitics shprehin pakënaqësi, ndërkohë që rezultatet e tre anketimeve janë në favor të zotit Biden.


Analistët thonë se rënia në perceptimin e punës së zotit Biden ka qenë veçanërisht e ndjeshme në radhët e votuesve të pavarur, të cilët e ndihmuan atë të fitojë zgjedhjet vitin e kaluar përballë ish-Presidentit Donald Trump.







Në muajin korrik, kur u mbushën gjashtë muajt e parë të presidencës së tij, zoti Biden gëzonte një avantazh mbështetjeje prej 9%, por deri në fund të gushtit, anketimet tregonin se votuesit amerikanë ishin të ndarë në perceptimin ndaj punës së tij.




Që atëherë ai ka humbur edhe më shumë terren dhe analistët politikë japin për këtë shpjegime të ndryshme.



Ishte periudha që përkoi me tërheqjen kaotike të ushtrisë amerikane nga Afganistani pas 20 vjet lufte, thonë analistët. Ata gjithashtu përmendin mosmarrëveshjet politike në Uashington mes republikanëve dhe demokratëve për rritjen e tavanit të borxhit, si dhe mes ligjvënësve demokratë progresistë dhe të moderuarve për zgjerimin e rrjetit të sigurisë sociale të vendit pas gati pesë dekadash.

Gjithashtu, numri i infektimeve të reja nga koronavirusi u rrit në shkallë vendi për disa muaj, përpara se të fillonte rënia më rishtazi, megjithëse rreth 70 milionë amerikanë vazhdojnë të jenë të pavaksinuar. Presidenti Biden ka urdhëruar vaksinimin ose testimin e shpeshtë për COVID-19ën të punonjësve në kompanitë me mbi 100 të punësuar, por udhëzimet vazhdojnë të jenë të debatueshme në disa pjesë të vendit dhe në disa biznese, ku ende nuk po zbatohen.

Senatorët demokratë dhe republikanë ranë dakord javën e kaluar për një rritje emergjence prej 480 miliardë dollarësh në autorizimin për marrjen e huave qeveritare deri në fillim të dhjetorit, kur kjo çështje do të duhet të rishqyrtohet. Ndërkohë me kërkesën e Presidentit Biden, ligjvënësit demokratë po përpiqen ta pakësojnë shifrën prej 3.5 trilionë dollarësh për një paketë të propozuar prej tij për rrjetin e sigurisë sociale dhe ta kalojnë atë deri në fund të tetorit paralelisht me legjislacionin dypartiak për infrastrukturën.

Miratimi i këtij legjislacioni dhe rënia e rrezikut nga koronavirusi mund ta përmirësojnë pozitën e Presidentit Biden, por faqja e internetit FiveThirtyEight vëren se Presidenti Biden ka në këtë pikë nivelin më të ulët të miratimit për një president që nga viti 1945, me përjashtim të dy presidentëve të tjerë, njëri prej të cilëve ishte zoti Trump.

E pyetur për rënien e mbështetje në anketime të Presidentit Biden, sekretarja e shtypit e Shtëpisë së Bardhë, Jen Psaki u tha gazetarëve se “Këto janë kohëra vërtet të vështira për vendin tonë. Jemi ende duke luftuar COVID-in, dhe shumë njerëz, ndër ta edhe ne, mendonim se tashmë do ta kishim kaluar “.

“Nuk ka dyshim se ndikon tek shumë aspekte”, tha ajo, si p.sh. tek zinxhiri i furnizimit të mallrave të konsumit të prodhuara jashtë vendit dhe të bllokuara në portet amerikane me personel të pamjaftueshëm. Ajo gjithashtu tha se njerëzit janë të shqetësuar për sigurinë dhe mirëqenien në vendet e punës.

Zonja Psaki shtoi se “fokusi ynë është të vendosim pandeminë nën kontroll, t’i rikthehemi jetës, një versioni të normalitetit”./VOA/

1


Etiketa: ,

CLOSE
CLOSE
Pas