Deklarata e Lulzim Bashës të enjten e kaluar në Parlament, se një bos droge, trafikant kokaine, ka blerë katin e fundit të një prej kullave 50-katëshe në Tiranë, ka vënë në lëvizje autoritetet.
“Është ngritur kulla 50 kate në bashkëpronësi me oligarkët dhe krimin e organizuar me gjithë bosët e narkotikës, gjithë bosët e kokainës. Siç e di ti fare mirë, siç e di edhe unë se kush bos kokaine ka rezervuar çfarë kati tek ndërtesa më e lartë në Shqipëri….” , u shpreh Lulzim Basha të enjten e kaluar në Kuvend, duke iu drejtuar Edi Ramës.
Pas kësaj deklarata, ministri i Brendshëm Bledi Çuçi i është drejtuar SPAK-ut me një shkresë, ku kërkon prej tyre të hetojnë denoncimin e Bashës. Çuçi e cilëson deklaratën e Bashës si shumë të rëndë dhe që cenon besimin e publikut te institucionet.
Ministri Çuçi në këtë letër thotë:
“Deklarata e bërë nga ana e z. Basha është deklaratë publike shumë e rëndë, e cila cënon besimin e publikut tek institucionet tona. Referuar legjislacionit në fuqi, përcaktohet se veprat penale të pretenduara në këtë deklaratë, janë pjesë e kompetencës lëndore të institucionit që Ju drejtoni. Në cilësinë e Ministrit të Brendshëm, si dhe në kuadër të misionit tonë të përbashkët në luftën kundër krimit të organizuar, më lejoni të përcjell kërkesën për verifikimin e kësaj deklarate dhe zbardhjen e plotë të çështjes”.
Strukturat nën varësinë e institucionit që unë drejtoj thotë ministri Çuçi, mbeten plotësisht në dispozicion të këtij procesi.
“Mbetem shpresëplotë se do të ndërmerrni hapat e nevojshëm për zbardhjen e kësaj çështje, për të përmbushur misionin tonë të përbashkët në luftën kundër krimit të organizuar, si dhe për të qenë transparent me publikun dhe partnerët tanë”.
Nëse SPAK do të vihet në lëvizje nga kjo kërkesë e ministrit Bledar Çuçi, me të gjitha gjasat kreut të PD Basha do t’i duhet të ngjisë shkallët e SPAK për të dëshmuar mbi këtë informacion, siç edhe ndodhi kur ai dha detaje për rastin e 3 milion euro të fshehura në makinat Tayota Yaris.
