Një gjykatë në Komore, këtë të hënën dha një dënim të përjetshëm për tradhti të lartë për ish-presidentin Ahmed Abdallah Sambi, i cili u dënua për shitjen e pasaportave për personat pa shtetësi që jetonin në Gjirin Persik.
Sambi, 64 vjeç, një rival i përhershëm i Presidentit Azali Assoumani, u dënua nga Gjykata e Sigurimit të Shtetit, një organ i posaçëm gjyqësor, vendimet e të cilit nuk mund të apelohen.
“Sambi dënohet me burgim të përjetshëm,” tha presidenti i gjykatës Omar Ben Ali, duke lexuar vendimin, i cili gjithashtu i hoqi ish-liderit të drejtën për të votuar dhe për të mbajtur poste publike.
“Gjykata urdhëron konfiskimin e pasurisë dhe aseteve të tij në dobi të thesarit publik”.
Sambi u dënua në mungesë pasi refuzoi të merrte pjesë në procedurë.
Ai u paraqit shkurtimisht në seancën e parë, ku avokatët e tij, pa sukses, i kërkuan gjyqtarit që të tërhiqej pasi ai më parë ishte pjesë e trupit gjykues që kishte paditur të pandehurin e tyre.
“Përbërja e gjykatës është e paligjshme. Unë nuk dua të gjykohem nga kjo gjykatë,” tha Sambi përpara se të bojkotonte seancat e mëtejshme.
Sambi, i cili udhëhoqi arkipelagun e vogël të Oqeanit Indian midis viteve 2006 dhe 2011, miratoi një ligj në 2008 që lejonte shitjen e pasaportave për tarifa të larta.
Ish-presidenti u akuzua për përvetësim të miliona dollarëve sipas skemës.
“Ai tradhtoi misionin që i ishte besuar nga Komoranët,” i tha gjykatës prokurori publik Ali Mohamed Djounaid javën e kaluar ndërsa kërkoi një dënim të përjetshëm.
Prokuroria tha se humbja në portofolin publik arriti në më shumë se 1.8 miliardë dollarë — më shumë se PBB-ja e vendit të varfër.
“Ata u dhanë banditëve të drejtën për të shitur kombësinë komore sikur të shisnin kikirikë,” tha Eric Emmanuel Sossa, një avokat për paditësit civilë.
Por avokati francez i Sambit, Jean-Gilles Halimi tha se “asnjë provë” që vërteton akuzat.
Sambi fillimisht u ndoq penalisht për korrupsion, por akuzat u riklasifikuan si tradhti e lartë, një krim që “nuk ekziston në ligjin komoran”, tha Halimi.
Ish-presidenti kishte kaluar tashmë katër vjet pas hekurave përpara se të përballej me gjyqin, duke e tejkaluar maksimumin tetë muaj. Fillimisht ai u vendos në arrest shtëpiak për prishje të rendit publik.
Sambi studioi në Arabinë Saudite, Sudan dhe në një shkollë teologjike në Iran, dhe zakonisht vishej me veshjet tradicionale të klerikëve iranianë, një stil që i dha atij pseudonimin “ajatollah”. /Përgatiti Liberale.al/